Ta keda na cada ciudadano pa proteccion di nan pertenencianan y tuma cierto medidanan cu nos tur sa cu esaki no ta un ciencia exacto, segun Alto Comisario di polis, Dolfi Richardson. Ta bon pa tuma medida pa ta sigur. Diferente dienst ta trahando duro pa percura pa locual cu ta biniendo di nos banda. Hopi cos a wordo bisa pero ta garantisa comunidad cu di parti di Cuerpo Policial, ta haci preparacionnan pa tin suficiente personal dispnonibel.
Cuerpo Policial ta responsabel pa cierto procesonan pa siguridad. Tin e parti di trafico tambe cu tin cu tene cuenta cune y un team special pa mobilidad di nos cayanan si ta necesario. Tambe nan tin un team responsabel pa e parti di evacuacion. E Alto Comisario a agrega cu lo trata di comunica esaki na tempo pa tur hende ta na altura cu lo bay tin y con e procedura lo bay ta..
Entrante awe mainta 7’or lo bay den un sistema di 12 ora. Tur colega lo ta disponibel, tur esnan cu vakantie lo wordo yama pa garantisa cu tin suficiente hende disponibel pa por draai algun dia around the clock, el a splica.
Si polis bisa pa bay cas, mester cumpl cu esaki, segun Richardsoni. Sigui ordo di polis. Na momento di crisis no por negosha. Sigui ordo di polis. No ta papia di 0 tolerancia ainda pasobra tin e confiansa cu nos tin un comunidad educa cu nan lo sigui instruccion. Ta haci apelacion di doñonan di heavy equipment pa por yuda desaloha e sushinan. Den pasado tabata tin un bon cooperacion y un biaha mas ta pidi pa bolbe yuda ora cu tin mester.
Cuerpo Policial lo duna conseho pa cera caminda of habri te cierto ora, Alto Comisario a agrega.
Na momento cu ripara cu lo bira peligroso, lo duna conseho pa desaloha caya y bay cas.
Manifestacion di awe tardi
Pa loke ta e marcha di awe tardi, Alto Comisario a comenta cu cada manifestacion ta pone un peso riba Cuerpo Policial. Na momento cu kier organisa cualkier evento grandi, ta pone un beslag riba capacidad di polis. Na momento cu tin cu pone mas polis disponibel, e ta trece gasto.
Personanan cu ta den contacto cu e organisacion pa loke ta e manifestacion di awe tardi, tin cu bay toch di 4 pa 7. Alto Comisario Richardson a comenta cu ta prefera pa tur cos caba prome cu solo baha.
Special pa “daredevils”
Tin hopi hoben cu ta gusta probecha ora tin mal tempo pa nan practica nan deporte, sea di bodyboarding, windsurfing of surfing por lo general. Alto Comisario ta manda un aviso pa e hobennan cu gusta bodyboard, pa no haci esaki. No mester hinca bida di personal di polis ni dibo mes den peliger, door di actonan iresponsabel. Na momento cu e situacion bira fastioso, hende tin cu riesga nan bida pa salba esun dibo.
Polis lo bay tin man yen, e alto comisario a enfatisa. E ta haci apelacion riba sano huicio di cada un di e ciudadanonan pa nan duna nan granito de arena den esaki, el a termina.