Altocomisario di Polis Vanessa Kock tabata presente na e reunion cu e lidernan politico di e partidonan participando den e proximo eleccion parlamentario di dia 25 di juni awo. E reunion a tuma lug ana John F. Kennedy Center for di Education.
E meta di e encuentro, Kock a bisa, ta pa scucha kico e partidonan politico tabatin di bisa pero tambe pa splica e representantenan e situacion cu tin na Aruba pa cual e campaña aki no por ta mescos cu esnan di pasado.
A bisa nan e punto di salida di maneho cu KPA lo hiba den e campaña aki y cual ta cu mester tene cuenta cu e crisis di COVID-19. Pa e ocasion aki tabata presente Sharlin Koolman di Departamento di Malesanan Contagioso cu por a duna un miho bista di e situacion di salud na Aruba na e momentonan aki. A duna informacion di e situacion actual y con nan ta spera cu e eleccion mester tuma luga den un situacion responsabel pa evita e crisis cu Corsou ta pasando aden.
Eleccion ta algo cu no por stop, pasobra e ta democracia, pero mester tene cuenta cu e maneho actual di COVID. Eleccion ta un punto importante riba agenda di DVG.
A splica esnan presente den e reunion cu tin tres componente cu mester traha cu otro: Eleccion, Medidanan di Crisis y Orden Publico. KPA no por desvia di e medidanan durante eleccion pa cual a haci apelacion pa e lidernan politico papia cu nan gruponan riba con ta hiba campaña teniendo cuenta cu e medidanan. “No por desvia di e medidanna aki pa eleccion. Mester tene cuenta cu e situacion actual ta algo hopi serio.”