Awe mainta durante un conferencia di prensa yama dilanti di bestuurskantoor pa e politico Allan Howell, el a splica cu el a tuma su retiro for di partido AVP y tambe como consehero di minister Mike de Meza. El a duna un sugerancia di cosnan cu tin cu tene cuenta cun’e cu ta hopi importante den bida, cu ta tres cos cu bo tin cu tin completo den bo plan di bida. E prome ta, semper kere den bo propio dignidad, e di dos ta, semper sa cu bo bida tin un balor hopi importante. E di tres punto ta, semper kere den bo mes.
Tambe tin otro puntonan importante, ta como hende bo mester tin bo norma y balornan hopi halto. Na momento cu bo tin bo norma y balornan hopi halto, lo bo por ta un persona, cu por ta un ehempel den comunidad y tambe bo por ta un rolemodel of un lider den comunidad, vooral como politico, e aspectonan aki ta hunga un rol hopi grandi na momento cu bo drenta den politica.
Un otro sugerencia cu e tin, cu tin cu tene cuenta, semper den bida ta, cu semper corda cu nos bida tin un balor significante pa bo mes y pa otro persona.
Loke cu e kiermen cu esaki ta, cu na dado momento kisas cualkier persona ta sinti cu nan bida no ta di color di rosa, pero corda semper si bo no por bula, core, si bo no por core, cana, si bo no por cana, gatia, pero den tur sentido di bida, bo mester sigui move. Nunca no permiti pa ningun hende por tenebo abao of otro persona bisabo cu bo no por, of otro persona no ta dunabo balor. Abo como persona mester sa bo mesun balor, kico bo ta para pe y kico ta bo principionan. Eynan e ta bay awe, caminda cu den aña 2012, el a wordo acerca pa prome minister, caminda cu el a bin su cas y a pidi’e dilanti su famianan pa e por forma parti di AVP, cual p’e tabata un decision hopi dificil, y tambe tabata orguyoso cu na momento ey prome minister por a mira su potencialnan cu e tin cu pa e por haci algo den comunidad, un diferencia miho bisa. Despues di delibera cu su bario, cu p’e ta sagrado, su hendenan na San Nicolas, su hendenan di comunidad di Aruba, su coleganan, su famia, a dicidi di tuma e reto di subi e partido AVP. Pero el a asumi e reto cu un pensamento y un meta, ta door di su educacion, su norma y balor, su preparacion cu e tin den Cuerpo Policial, pa e por haci e diferencia den comunidad pa Aruba, muy en especial pa su bario y su hendenan di San Nicolas.
Lastimamente tin cu bisa cu e no a logra su meta. Tur hende sa cu el a logra haya un bon resultado den 2013, cual e ta gradici su sostenedor y votadornan cu no a defraud’e cu por bisa orguyosamente, cu a kibra un record, den e sistema di eleccion pa prome biaha un persona riba un number 27, cu porcierto tabata riba AVP, cu den historia no a yega di pasa 100 voto. El a logra den menos cu 1 luna di tempo, pasobra e tabata e ultimo candidato tambe cu a wordo anuncia riba e lista di AVP durante eleccion y a logra saca 422 voto riba number 27.
Loke si no tabata facil ora cu a pone hendenan den Parlamento cu no tabata tin asina hopi voto manera su persona pa cual aki Howell ta splica con tur cos a bay.
El a keda pafo di Parlamento y e mester a splica su hendenan con procedura ta bay y tene nan trankil. Su hendenan a bis’e for di e tempo ey caba, cu nan lo bay sigui sosten’e, pero no lo por pasa pa di dos biaha. Hopi hende ta puntra con el a yega na number 27. El a splica publicamente cu e number no sa e number di antemano. Den AVP, den e caso aki, e number a wordo duna un dia prome cu entrega lista. Y na momento cu a haya 27, e ta corda cu e tabata sa cu ta un number cu practicamente ta afo, pasobra traha lista ta mescos cu un lign up di baseball. Ta 9 hende por hunga. Si pone 100 hende mes riba bo lign up, na final di dia ta 9 ta bay hunga. Na momento cu cualkier lider di partido of cualkier partido traha un lista, nan sa exactamente friamente calcula, ken ta bay hinca den parlamento.
Di tur manera, Howell a splica cu su team a dicidi y e mes a dicidi di apesar cu el a haya 27, cu nan ta bay mustra su calidad y potencial cu e tin como persona y e willpower cu e tin pa traha pa comunidad.
Howell ta gradici un biaha mas cu den e tempo corto ey por a saca 422 cu tur respet pa su coleganan di partido mes cu e tin mas hopi voto cu mayoria den Parlamento.
A keda monitor 4 aña largo y cuminsa fiha kico e partido ta bay tin intencion, ki rol nan ta bay tin p’e den e siguiente eleccion cu ta bin. Lastimamente, el a sinti y su siguidornan a sinti cu no a demostra un plan concreto ki rol Howell lo hunga den e siguiente eleccion. Mirando tur esey a dicidi e momento ey di acerca e lider di partido y durante di algun bon combersacion, tabata tin den un bon ambiente, lastimamente no por a come over y dun’e un sentimento sigura ki rol Howell ta bay tin pa e siguiente eleccion. E no a drenta den politica pa cos, e no a drenta den politica pa trabao, e tin funcion pa 23 aña caba den Cuerpo Policial, como Chef van Dienst na Playa. Tambe e ta fungi como subfiscal y e no a drenta den politica pa ningun otro motibo pa haci diferente den comunidad y muy en especial pa pariba di brug, San Nicolas y su bario.
Pa sinta na mesa no ta malo pa sinta cu ningun hende, pero publicamente el a sinta varios biaha cu Prome Minister. Tin biaha su siguidornan ta bisa cu hasta ta kere cu ta wega esaki ta. Allan Howell no a drenta politica pa wega. Politica no ta wega. Politica tin di haber cu nos pais y na momento cu ta bezig ta atende cu nos pais, ta cos serio tin. Howell a tuma su decision caba a base di sosten cu el a haya di su bario, di su siguidor y hendenan y ta kere pa papia semper ta bon pasobra no a termina na malo cu e partido cu ningun hende. No tin problema personal cu ningun hende. E tabata tin un bon combersacion tambe ayera nochi laat pa basta ora cu minister Mike de Meza y a pone su puntonan cla. Su puntonan ta puntonan cu ta bin dilanti cun’e cu no ta sorpresa pa ningun hende. Tur hende sa ki situacion tabata cun’e, cu el a keda afo di Parlamento y den su opinion personal, no a sinti su mes parti cu el a hunga e rol cu el a drenta politica p’e y no ta mirando tampoco cu tin un rol specifico p’e, ki e ta bay haci pa e siguiente eleccion. A base di esey el a tuma su retiro.
Allan Howell lo bay evalua. E prome paso tabata pa comunica cu pueblo, splica kico ta pasando, kico ta e pasonan cu el a tuma. Durante e fin di siman aki ta bay sinta bek cu su siguidornan, su bario, su hendenan, su famia, su coleganan y na final lo tuma un decision. Tin cu bisa si, cu el a sinta scucha varios partido. E no tin problema pa scucha partido. Al contrario, ta hopi contento cu nan a mira su potencial y nan tin interes serio den dje y esun cu e ta bisa di dje, si tur cos bay bon, y cu bendicion di su hendenan. Si bo no tin bo hendenan cubo. Allan Howell no a divulga cua partido e lo uni na dje, na final di e conferencia di prensa.