For di siman pasa caba tin indicacionan ta mustra cu kisas nos por bay haya poco awasero. Mirando algun punto cu departamento di Meteo a splicando den e dianan aki. Ta na su luga tambe pa esnan cu kier planta tuma algun conseho pa por colecta poco awasero na momento cu yega asina leu cu Aruba lo haya poco awa.
Lo ta hopi bon si den caso por tin bakinan blanco di un ton. Por tambe barinan di plastic cu por yuda coi poco awa. Check bo conexionan pa asina por dirigi esaki na e bari of tanki pa e por yena. Den caso cu no tin “goot”(hit) na rand di dak di cas por check un compania of Hardware Store cu por tin esaki disponibel. Esaki lo yudabo hopi na momento cu awasero ta cay y asina por coy poco awa. Claro mas grandi bo dak di cas ta mas awa esaki por “catch”. Den caso cubo tin e “goot” (hit) caba instala na e rand di dak, lo ta bon pa tira un bista unda e por ta kibra of e tin liek. Por ta e caso tambe cu si bo tin matanan grandi planta rond di cas por subi riba dak wak si por tin sushi cu ta e foyona seco cu por ta den e “goot” y asina obstaculisa e pasamento di awa den e “goot”. Lo ta bon pa pasa un basora bari esaki y saca tur sushi pa asina e no stroba e pasada di awa den e “goot”. Esaki ta conta tambe pa esnan cu regenbak. Tuma nota si cu ta hopi importante cu na momento cu bo kier bay colecta poco awa sea den bari, Hemchi. of bakinan blanco tene cuenta cu esaki mester wordo bon tapa. Percura pa pone algo riba dje pa asina e ta bon cera di tal forma cu ningun sangura por produci aden. Esaki sigur por forma un peliger di entre otro Dengue pabo mesun famia y sigur tambe den bo vecindario. Por uza manera tshirt pa tapa esaki si ta hemchinan di cinco gallon of den caso cu bari por pone sea “net” of wayanan di sefta fini cu por tap’e bon contra sangura. Por busca algun otro producto cu por tira den e awa cu tambe ta preveni e sanguranan di produci manera “Mosguito Dunks “ cu ta obtenibel na mayoria pest control.
Awa por causa molester pabo bestianan
Pa esnan cu tin cria di Cabrito of Carne tambe mester tene bon cuenta cu na momento tin un awasero torencial. Percura pabo bestianan tin un lugar adecuado pa refugia durante cu awa ta yobiendo. Chek rond den cura si tur cos ta bon cu e cura cu nan ta cera den. Controla e zinknan ta firme claba of wanta pa esaki no mester bula y hasi daño nabo mes of na e bestianan. Wak tambe cu no tin posiblidad pa awa keda para net na unda cu e bestianan ta. Esaki por trece cune cu e bestianan por bira malo pa motibo cu e temperatura ta baha y e bestianan por haya friu. Esaki por trece cune algun malestar pa e bestianan cu por causa nan morto tambe. Pese lo ta bon pa wak den cura di e bestianan kico por wordo haci cu e diferente pasadanan di awa pa asina esaki no crea molester pa e bestianan.
Di parti di Departamento di Agricultura, Cria y Pesca tur trabou di damnan rond Aruba a wordo haci limpi. Esaki sigur nos a traha cu e miras cu si un awasero torencial cai e damnan aki por wanta hopi mas awa. Sigur nos cunukeronan lo sa di probecha di esaki pa un period hopi largo si esaki mester tuma luga.
Tuma un rato dibo tempo wak rond kico bo por preveni pa no causa daño nabo mes of e bestianan cu sigur ta mihor cu lamenta.