E nivel di alerta pa Kick “em Jenny, e volcan submarino localisa cerca di e costa di Grenada, a wordo hisa pa codigo Oraño.
Un alerta oraño kiermen cu tin nivelnan halto di actividad sismico, y cu un erupcion por tuma luga den menos di 24 hora.
E Organizacion Nacional di Salvamento y Siguridad Maritima di Espacionan Acuatico di Venezuela (ONSA) diamars a adverti cu a establece un zona di exclusion pa navegacion maritimo di mas o menos 3 miya nautico di e volcan submarino Kick ’em Jenny. Esaki ta relaciona cu e actividad cu e volcan aki, ubica na 8 km noord di Grenada.
ONSA a recomenda pa declara un “estado di alarma” pa zonanan acuatico y zonanan costero di e oriente di Venezuela, manera Pampatar, Puerto Sucre y Carupano, ” relaciona cu e actividad tsunamigenico cu por presenta den caso di un erupcion.
Dialuna, e Agencia Nacional di Administracion di Desastre (NaDMA) di Grenada a emiti un “codigo oraño” despues di cu e Centro di Investigacion Sismico di Indianan Occidental (UWI/SRC) a reporta un nivel halto de actividad volcanico Kick ’em Jenny, cu ta situa na 200 m bou di nivel di lama.
Na Juli 1939 a erupcion mas grandi di Kick’em Jenny a tuma luga, ora cu el a manda un nubia di gas y shinishi cu a bay te na 275 m riba e superficie. E actividad a genera un serie di tsunami cu olanan di te cu 2 m di haltura.