Na e lugar aki, uno di su cientificonan a muri na aña 2004 despues cu el a hinca su mes accidentalmente cu un hangua cu tabata contene e virus di Ebola. Den e Centro di Virologia y Biotechnologia (Vektor) di Siberia, Koltsovo, a keda registra un explosion grandi cu a afecta un area di 30 meter cuadra. E explosion a tuma luga debi cu un boter di gas a rementa cu tabata riba e di cinco piso di e edificio y esaki tambe a crea un candela grandi. Aunke e autoridadnan a duna di conoce cu e edificio no a ricibi daño riba su structura, un trahado a resulta gravemente herida cu quemaduranan riba mas di 45 porciento di su curpa. E Centro Vektor ta posee e colecion di virus mas grandi na mundo, cual ta inclui Ebola, Sarampi, SARS (Sindrome Respiratorio Agudo y Grave) entre otro. Sinembargo, directiva di e laboratorio Ruso a declara cu na e momentonan aki e explosion no tabatin material di risico of restonan biologiconan presente. Pero den pasado ya caba a yega di presenta accidentenan na dicho lugar cu a afecta e comunidad den e zona. E Centro di Virologia y Biotechnologia ta un di e centronan di investigacion mas grandi na mundo, cual ta desaroya vecunanan y diagnosticonan pa tratamento di enfermedadnan contagioso. Tambe e ta conoci pa fabricacion di armanan biologico durante e epoca di e Guerra Frieuw. Segun reportenan erornan medico ta causa di 2.6 miyon morto cada aña segun e Organizacion Mundial di Salud.
E accidente aki a sosode un luna despues cu un deposito di municion a explota tambe den e region Siberiano, cu a laga 12 persona herida y a obliga evacuacion di mas di 16 mil cuidadano.