CUCUTA, Colombia- E opinion publico na Colombia ta mantene su mes altera pa loke ta un aumento den mobilisacion militar na e frontera Colombo- Venezolano, y e aterisahe di tres avion Mericano den teritorio nacional. Esaki, despues di cu a revela un supuesto movimento di tropanan Mericano den e pais.
E preocupacion riba e yegada di militarnan Mericano a cuminsa despues di cu a sali na cla un anotacion cu e consehero di Siguridad di Merca, John Bolton ta bisa cu “5 mil tropa pa Colombia”. Aunke esaki a wordo desmenti cu ta trata di un movimento militar.
Sin embargo, siman pasa tres avion militar Mericano a baha na e pais aki, cual a wordo confirma door di e minister di Defensa, Guillermo Botero, cu a sigura na La FM cu ta trata di un presencia rutinario.
E funcionario a alega cu’n avion ta di e fiscal Matthew Whitaker, y otro di Howard Buffett, yiu di Warren Buffett, presidente di e grupo Berkshire Hathaway, y “donacionnan grandi pa e desminado na Colombia, cu a haci aportenan significativo”, el a bisa na e emisora.
E di tres ta un avion C17 di carga militar, cu ta haci vuelonan frecuente pa Colombia cual tin luga pa solamente 130 soldaat, segun Steve Herman, coresponsal di Voice of America, cual lo no ta relaciona cu e supuesto mandamento di 5000 soldaat destina pa e pais door di White House.
Pero si den fin di siman varios medionan local y usuarionan di rednan social a denuncia un creciente movimento di forsanan militar na frontera di Colombia cu Venezuela, di ambos banda. Apart di esaki, Noticias Uno a informa di e desembarco di mariniernan Mericano na La Guajira, pa supuesto enfrentamentonan segun fuentanan oficial.