E Conseho Noruechi pa Refugiado (NRC) a denuncia diahuebs cu por lo menos 3 mil persona na Colombia lo a bira victima di reubicacion forsa den e region di Pacifico durante e dos prome simannan di januari 2024, debi n’e empeoramento di e conflicto arma entre e gruponan arma iregular.
E organisacion humanitario independiente – cu ta dedica na duna ayudo n’e personanan cu ta obliga pa huy di nan teritorio, ta destaca cu e zonanan cu a reporta e mayor cantidad di movemento forsa masivo ta e municipionan Olaya Herrera y Samaniego, di e departamento di Nariño, den e extremo zuidwest di Colombia n’e frontera cu Ecuador.
Segun NRC, e enfrentamentonan arma a obliga pa mas di 3 mil persona so, huy “den e prome dies dianan di januari.” Fuera di esey, e organisacion a tuma na cuenta reporte di varios medio cu ta informa riba e movemento masivo den e departamento di Valle del Cauca, zuidwest Colombiano, motibo pa cual nan ta pidi e autoridadnan local pa intensifica e apoyo n’e victimanan den e zonanan afecta p’e conflicto.
Giovanni Rizzo, director nacional di NRC na Colombia, a bisa di ta “profundamente preocupa p’e miles di homber, muhe y mucha” cu ta biba den e zonanan remoto di e pais y cu a haya nan obliga pa enfrenta “un cantidad nobo di desplasamento, violencia y confinamento forsa” desde principio di 2024.
“Nos ta haci un yamada n’e autoridadnan, en particular e alcalde y e gobernadornan recien nombra di e region di Pacifico, pa nan cumpli cu nan obligacion di brinda ayudo na tur e victimanan di e conflicto arma,” e activista a indica.
Mas di 10 mil persona bao confinamento forsa
Di acuerdo cu e datonan acumula pa NRC, cu base riba e informenan preliminar di autoridad local, medio, e lidernan comunitario y di e Oficina di Coordinacion di Asunto Humanitario di Nacionnan Uni (OCHA), den e prome 15 dianan di 2024, e conflicto arma escala a obliga otro 10 mil persona keda cera den nan cas.
E mayor cantidad di persona afecta ta den e departamento di Choco, caminda “mas di 9 mil persona” ta victima di e fenomeno ey “desde november 2023,” pa motibo di enfrentamento arma y menasa di morto contra e civilnan, metodo uza p’e gruponan arma pa controla teritorio, e organisacion humanitario a splica.
Otro situacion “preocupante” ta registra den e municipio Jurado di e departamento di Choco, n’e costa Pacifico nort limite cu Panama. Segun e organismo ta adverti, n’e localidad aki lo tin mas di mil persona obliga pa keda cera den cas.
Mas di dies mil movemento forsa den 2023
Segun e datonan di OCHA Colombia, na 2023, casi 105 mil persona a wordo afecta directamente p’e conflicto arma Colombiano “den 161 evento di emergencia masivo.” E mesun cantidad di victima aki a haya nan obliga pa “desplasamento individual.”
E situacion aki, segun e oficina di Nacionnan Uni ta adverti, ta mustra un tendencia actual cu ta sugeri “e continuacion di e emergencianan masivo y e necesidadnan humanitario conexo” pa 2024.
A pesar di e realidad preocupante aki, OCHA a destaca cu desde e toma di posesion di e gobierno di Gustavo Petro – mas di un aña pasa – e Ehecutivo a logra “avance importante den materia di politica” y “a demostra un compromiso proactivo pa promove e esfuersonan di “Paz Total.”
Entre e medidanan gubernamental efectivo, ta e promocion di “dialogo y bahamento di arma” cu algun grupo arma irregular, manera esunnan acorda cu e guerrillanan di Ejercito de Liberacion Nacional (ELN) y di e disidencianan FARC, conoci como “Estado Mayor Central.” (EMC-FARC).
“A pesar di e esfuersonan aki, Colombia ainda mester enfrenta desafionan humanitario persistente – particularmente den e areanan caminda e presencia y e capacidad di e estado ta mas limita – cu ta surgi di e impacto geografico den expansion di e conflicto arma interno, nan intensificacion den algun area y e desasternan andando,” e organismo a indica.
OCHA tambe a señala cu aunke “a observa algun avance den algun area, den termino di reduccion di e violencia deriva di e enfrentamentonan arma den e contexto di e acuerdonan di bahamento di arma”, ainda “ta persisti preocupacion” encuanto e delitonan di e gruponan irregular relaciona n’e control territorial y social manera ta: e reclutamento di mucha, secuestro, contaminacion pa minanan terestre, desplasamento, violencia di genero, restriccion di mobilidad y restriccion di acceso.
Riba esaki, director di NRC ta considera cu lo primordial, den e situacion aki, ta garantisa “e speransa di paz entre e comunidadnan cu ta lucha pa biba un bida normal, liber di violencia,” a traves di e “implementacion di e acuerdonan dentro di e actual proceso di paz, incluyendo un compromiso firme pa defende e respet n’e derecho internacional humanitario.”