Servicio Meteorologico ta siguiendo di cerca Tormenta Tropical Matthew ubica 11’or di diahuebs mainta na 14.2 noord y 66.3 west cu ta na mas of menos na 435 km oost noordoost di Aruba. Matthew ta moviendo west 13 nudo/24 km/h, cu bientonan maximo rond di e centro di 110 km/ora.
Un alerta pa Tormenta Tropical ta na vigor pa Aruba; Esaki kiermen cu condicionnan di
Tormenta Tropical ta posibel.
Alerta: Un aviso pa boto chikito ta na vigor desde diaranson anochi.
Alerta: Un aviso pa inundacionnan di termino corto ta na vigor for diahuebs anochi te cu diabierna.
Matthew su movecion ta depende di dos factor.
1. Un sistema frontal cu lo sali for di Merca diahuebs/diabierna.
2. Un area di presion halto ubica riba mar Atlantico.
Te na e momentonan aki ta calcula cu Matthew su centro di circulacion lo por pasa mas of menos na un distancia di 150 pa 200 km noord di Aruba den curso di diabierna mainta tempran.
Tormenta Tropical Matthew lo haci e aire mas humedo y instabil, aumentando chens pa awasero pa e proximo dianan.
Biento lo boltia tambe y lama por bira brabo.
Pronosticonan:
Diahuebs:
Parcialmente te basta nubla. Chens pa awasero compania cu lamper y strena principalmente mainta. Chens pa awasero den atardi ta un tiki menos. Biento di noord-noordwest alrededor di 9 nudo, cu rafaga te 19 nudo, den mainta, cambiando pa west-noordwest den atardi. E biento por varia di direccion tambe parti mainta. Posibilidad di awa 60 %.
Diahuebs anochi pa diabierna marduga:
Parcialmente nubla te basta nubla. Chens pa awasero compania cu lamper y strena. Biento di west alrededor di 13 nudo, cu rafaga te 23 nudo, den anochi, cambiando pa west-zuidwest despues di marduga cu rafaga te cu 34 nudo. Posibilidad di awa 60 %.
Diabierna:
Parcialmente nubla te basta nubla. Chens pa awasero compania cu lamper y strena. Biento di zuidwest alrededor di 18 nudo, cu rafaga te 35 nudo, den mainta, cambiando pa zuidoost 15 nudo, cu rafaga te 28 nudo, den atardi. Posibilidad di awa 70 %.
Diabierna anochi pa diasabra:
Parcialmente nubla te basta nubla. Chens pa awasero compania cu lamper y strena. Biento di zuidoost alrededor di 18 nudo, cu rafaga te 28 kts. Posibilidad di awa 70 %.
Posibel efectonan di e pasashi di Matthew :
– Por spera un total di yobida di entre 40 pa 100 mm pa e periodo di diahuebs te cu diasabra.
– Localmente por anticipa acumulacionan di 10 – 40 mm pa dia (24 hora).
-Lama lo bira mas bruto diahuebs anochi dependiendo di e distancia cu e sistema aki pasa lo por tin olanan di entre 8 pa 12 pia na cierto partinan di costa.
-Dependiendo di e distancia cu e sistema pasa di Aruba por tin biento cu rafaga te 34 pa 38 nudo (Beaufort 8).
Ta avisa pueblo di Aruba pa keda pendiente pa boletinan oficial di tempo di gobierno via e canalan oficial di gobierno.
Servicio Meteorologico di Aruba ta den contacto cu diferente otro servicio meteorologico di e regio, National Hurricane Center na Miami y KNMI.
Indicacion ta cu ora e sistema pasa Aruba panoord di Aruba e lo ta un horcan debil.
Un proximo aviso tocante e situacion di tempo tropical lo wordo emiti diahuebs atardi 6 pm, esey lo bira boletin nr 8.
E boletinan di prensa relaciona cu e sistema tropical ta wordo hasi den coordinacion cu Minister di Transporte, O.E.Oduber y Minister di Asuntonan General M.Eman.