SOCHI, Rusia — Cataloga como demasiado jong y sin experiencia na comienso di e torneo, e seleccion Aleman no a tarda mucha den madura.
Decidido den e atake for di e fluit inicial, diahuebs Alemania a elimina Mexico 4 pa 1 y ta avansa pa prome biaha pa e final di Copa Confederaciones, unda cu diadomingo e lo topa cu’n seleccion di Chile, confidente e biaha aki, despues di a conkista dos biaha sigui e titulo maximo di Copa America.
Leon Goretzka a habri e marcado contra di Mexico trempan den wega, cu dos gol den e prome 8 minuutnan y Timo Werner y Amin Younes a agrega otro par mas den e di dos tempo. Asina Alemania ta mantene un record perfecto den cinco wega contra di e ekipo Mexicano. Marco Fabian a habri e marcado na ultimo minuut cu un tiro pafo di e area.
“Nos ekipo a siña hopi”, e tecnico Aleman Joachim Loew a bisa. Su ekipo ta esun di mas jong di henter e torneo, cu un edad promedio net bou di 24 aña.
Mexico lo topa cu Portugal pa e di tres luga diadomingo na Moscu. E campeonnan Europeo, cu diaranson a cay durante e semi- final contra di Chile, no lo conta cu su astro maximo Cristiano Ronaldo, cu a bandona e torneo pa nacimento di su yiunan morocho.
Fuente: www.es-us.noticias.yahoo.com