VENTOTENE, Italia – Lidernan di e mayor economianan di e Eurozone a combersa dialuna, tras di e sorpresivo decision di Reino uni di bandona Union Europeo, y a bisa cu Europa mester scucha e populistanan pa culpa Brussels di tur problema.
Riba un barco na e islanan Italiano di Ventotene, e canciyer Aleman, Angela Merkel, e presidente Frances, Francois Hollande y e prome minister Italiano, Matteo Renzi, a haci un yamada na un mayor cooperacion den siguridad y mas oportunidad pa hobennan.
Durante un encuentro carga di simbolismo, e tres lidernan a bishita Ventotene pa laga un ofrenda na e graf di Altiero Spinelli, un intelectual Italiano kende ta wordo considera un di e tatanan fundado di e unidad Europeo.
Despues nan a aborda Garibaldi, cu ta na cabes di un mision di Union Europeo pa combati e traficantenan di hende cu a transporta cientos di miles di refugiado pa e Mediteraneo pa Europa.
“Pa hopi populista, Europa tin culpa di tur loke ta sali malo,” Renzi a bisa, prome cu e lidernan a reuni riba e barco pa e conversacionnan. “E imigracion ta culpa di Europa, si e economia ta anda malo ta culpa di Europa. Pero esey no ta berdad,” el a agrega.
E reunion a supone pa prepara e tereno pa un cumbre di UE na Bratislava otro luna.
E conversacionnan di dialuna ta e comienso di un siman di reunion di Merkel cu otro Gobiernonan Europeo, cu ta considera e bishita na cuater pais y ricibi ocho lider.
“Nos ta respeta e decision di Gran Britania, pero tambe nos kier laga bon cla cu e otro 27 (estadonan miembro) ta conta cu un Europa prospero y sigur,” e Canciyer Aleman a bisa.
Fuente: Reuters