E artista multifacetico Ruthy “Lady Ruth” Vrieswijk-Bergen ta cla pa comparti di curason pa curason su poemanan, canto y baile riba diaranson dia 24 di Mei 2017. E dia y anochi tan spera a yega, ta yegando awor di berdad, un soño realisa despues di su participacion den Manic Monday aña pasa. Cu hopi, pero hopi luz y gradicimento na su humilde curason e ta cla pa celebra su 44 añanan den Farandula cu tur cu conoce, cu ta apoy’e y stim’e. Pero tambe cu esnan cu ta bay haci conoci cu ‘Lady Ruth’ den accion pa prome biaha, e biaha’ki riba e stage di Cas di Cultura.
Na Cas di Cultura portanan ta habri ya pa 07:00 pm pa den e foyer por disfruta di un dushi welcome drink, un dushi sangria Lolea di Manrique Capriles. Lo tin Ruthy su coleccion di potretnan pinta pa diferente artistanan pintor local y internacional, pa duna e impresion di hende muhe su diferente etapa y facetanan den bida. Esaki ariba peticion di Fundacion Hende Muhe den Dificultad. Tur ta caranan di Ruthy den diferente expresion. Danki na e artista Maritza Erasmus pa e bunita set up di esakinan den e foyer.
Despues por drenta e sala grandi principal di Cas di Cultura pa inspira cu e Power Point Slide Show di ‘Lady Ruth’, cu lo wordo pasa 07:30 pm cu potretnan den farandula cu coleganan artista, amigo, famianan y su “role models”. Pa despues pa 08:00 pm “Alegria di Ruthy” cuminsa cu bunita introduccion duna pa Sra. Luty Martinez, un di nos miho actriznan di Aruba.
Nos musiconan profesional : Mario Kelly, Jerry Diaz, Tino Ruiz y Albert Croes lo compaña Ruthy cu su poemanan, baile y canto.
Nos invitadonan special : Alex Berkley como e pareha bailado di Ruthy pa e anochi’ki y Sra. Guisela Croes di Centro Holistico Splendor, Fundacion Faro di luz, kende lo contesta algun pregunta di Ruthy riba stage, pa nos tur por inspira riba mas alegria.
Cu un danki na nos sponsernan principal: Unoca, Aruba Bank y ITP Caribbean, Manrique Capriles, Departamento di Cultura, La Moderna y Optica Moderna, Biblioteca Nacional y Tele Aruba. Cu un danki special na Tia Loly di Beauty Salon Loly! Love you all!!!
Lady Ruth ta spera bo den Cas di Cultura pa su One Woman Show ‘Alegria di Ruthy’ riba diaranson 24 di Mei 2017 pa 08:00 pm den Cas di Cultura. Bin celebra su 44 aña den Farandula.