MERCA – Alcaldenan di varios ciudad di Merca a afirma diabierna desde Mexico cu nan no lo cambia nan politica migratorio, apeasr di e menasa di e presidente electo, Donald Trump, di deporta por lo menos tres miyon di indocumentado cu antecedentenan penal.
Den e marco di e cumbre di e grupo di Liderasgo Climatico C40, e alcaldesa di Washington D.C., Muriel Bowser, a lidera un rueda di prensa unda cu seis alcalde Mericano a reafirma nan compromiso cu e lucha di cambio climatico y proteccion di e residentenan di nan urbanisacionnan, specialmente di e migrantenan.
Despues di e eleccion Mericano, 42 di nan a entrega un carta na e mandatario electo caminda cu nan ta reclama pa nan mantene Merca den e Acuerdo di Paris y pa duna sosten na e iniciativanan local contra e cambio climatico cu inversion federal.
Den e campaña electoral, Trump a menasa pa retira Merca di e Acuerdo di Paris, logra na December 2015 pa e Convencion Merco di Nacionnan Uni riba cambio climatico, den e transcurso di e 21 Conferencia di e Partinan (COP21).
Destina na substitui e Protocol di Kioto na 2020, den e convenio e paisnan a compromete pa ehecuta “tur esfuerso necesario” pa nan no pasa 1.5 grado y evita asina “e impactonan mas catastrofico di e cambio climatico.”
E alcalde di Phoenix (Arizona), Greg Stanton, a bisa cu e Administracion nobo aki lo purba id uza restriccion pa pone en marcha e prioridadnan federal, pero a destaca cu e alcaldenan “a wordo eligi pa implementa e medidanan prioritario pa comunidadnan.”
“Aunke hopi kier deporta e imigrantenan, nos no lo bay haci’e,” e alcalde di e capital di Arizona a bisa, un estado unda cu e Republicano a gana dia 8 di November y unda tin un auge di extrema derecho y di racismo.
E vicealcalde di New York, Anthony Shorris, a expone cu den e urbanisacionnan lo prevalece e ehenan di “imigracion, integracion y e poder di imaginacion cu ta uni e forsanan aki.”
“Daña e gran historia di Merca (cu deportacion) lo ta algo hopi perhudicial,” el a bisa.
E alcalde di Seattle (Washington), Ed Murray a bisa cu nan lo sigui traha cu e comunidad internacional. “Mientras algun ta papia di traha muraya, otronan ta kere cu nos por tin brug pa por kibra e muraya ey,” el a subraya.
“Nos no ta ingenueo respecto na e entorno politico cu nos lo enfrenta den futuro, pero (e alcaldenan) por sigui eherce liderasgo,” el a agrega.
E alcaldesa di Washington D.C. a bisa cu “aunke ningun hende a spera e resultadonan electoral,” el a instrui parti di su ekipo pa analisa e riesgo y oportunidadnan di e Administracion di Trump.
Entre e ultimonan, el a menciona e intencion di e Republicano di inverti miyones di dollar den infrastructura, loke a considera un ‘bon noticia’, vooral si ta haci’e “di forma sustentabel.”
E acto, celebra den e ultimo dia di e forum, tambe a conta cu e asistencia di e alcaldenan di Portland (Oregon), Charlie Hales y di Austin (Texas), Steve Alder.
Fuente: NTN24