CARACAS, Venezuela- E maximo tribunal di Husticia Venezolano diamars den oranan di marduga a sentencia e alcalde opositor di Chacao, Ramon Muchacho, na 15 luna di prizon y ta retir’e for di su puesto. E ta wordo acusa di no a prohibi e blokeo di caminda den su municipio, caminda mayoria di e protestanan anti- gubernamental a tuma luga.
Muchacho no a acudi na e audiencia, cu a dura mas di nuebe hora, y cu ta scondi actualmente for di ora cu e huicio den su contra a cuminsa algun siman pasa.
E abogado di 44 aña ta e di cuater alcalde opositor cu ta wordo condena durante e ultimo dianan. Un di nan, Carlos Garcia, ta den exterior, Alfredo Ramos ta preso den e calabozo di e servicio di inteligencia na Caracas y Gustavo Marcano a huy for di e pais.
“Sala Constitucional di TSJ (Tribunal Supremo de Justicia) ta sanciona Ramon Muchacho cu 15 luna di prizon”, segun un comunicado ariba nan cuenta di Twitter, agregando cu e durante e tempo cu e ta condena, e ta keda prohibi pa presenta cargonan publico di eleccion popular.
Venezuela ta pasando un crisis serio di inflacion di tres digito, falta di cuminda y recesion economico pa cual oposicion ta culpa Nicolas Maduro. For di April, miyones di Venezolano a sali riba caya pa protesta cu a laga un saldo di mas di 120 persona morto.
E mandatario socialista a sigura cu e protestanan ta pa sak’e for di poder, pero su adversarionan ta di opinion cu na Venezuela a cuminsa un dictadura, cu e instalacion di un Asambela Constituyente cu a crea un polemico na nivel mundial y regional, cual lo mester traha ariba un constitucion nobo y cu lo tin e dominio ariba e resto di podernan publico.
Varios pais a nenga na reconoce e Constituyente proponi door di Maduro y a pidi su gobierno pa libera tur e “presonan politico”.
“Tur e peso di inhusticia revolucionario a cay riba mi y ariba Chacao”, segun Muchacho a scirbi ariba su cuenta di Twitter.
“Nos ta wordo condena pa haci nos trabao, pa garantisa e derecho legitimo pa e protesta pacifico”, el a agrega. “Mi pensamentonan ta cu e miyones di Venezolanonan cu ta sufri y ta padece e inclemencia di e regimen aki, sin tin acceso na husticia”.
Dialuna anochi, un funcionario Mericano a bisa cu e gobierno di Donald Trump lo prepara sancionnan contra otro grupo di funcionarionan Venezolano contra di Maduro. Esaki den respuesta di e instalacion di e Asamblea Constituyente.
Fuente: http://lta.reuters.com/article/topNews/