Tur aña Fundacion Movimento ta Bida durante e Torneo di Jani Brokke Memorial ta reconoce un persona cu henter su bida a dedica na deporte aki na Aruba.
E aña a ki a toca turno na senor Albert “Cachi” Henriquez . Cachi for di hopi jong caba a dedica su mes na e deporte di tennis na unda hopi hungadonan cu ainda ta hungando a haya les di dje.
Den principio Cachi tabata duna les na Tarabana unda cu tabata tin un cancha di tennis pero el a spaar su placa y a traha su mesun cancha di tennis na su cas cu te ainda e tin.
Albert “Cachi” Hneriquez den Juli ultimo a cumpli 80 aña y e ta un ehempel bibo di loke FMTB ta trece dilanti den active aging. Tur dia bo por haya Cachi ta haci spinning of otro actividad y sigur dos biaha pa siman e ta hunga tennis cu su grupo di Men’s Club na Eagle Club y na Gold Coast.
Diamars ultimo presidente di FMTB Rudy Leysner a bin na Gold Coast pa wak Cachi den accion y a entrege su plakkaat di merito mey mey di e resto di miembronan di Men’s Club. Nos tur ta spera cu Cachi keda hopi aña mas cu nos disfrutando di su trikinan di tennis y su storianan cu nunca ta falta.
Un danki na Gold Coast cu su White Cuisine cu a sa di prepara tremendo snacks y drinks p’asina e tennistanan por a celebra cu nan mentor Albert”Cachi” Henriquez.