Pa Alba Cortez, suegra di e polis deteni, Eduardo Bremo, esnan cu ta investiga mester investiga e caso di e prosituta mas miho, pasobra e ta gaña den e caso aki.
E ta pidi pa wak e reaccion di e muhe. E ta kere cu un hende ta gaña si e mester wordo confronta. Cortez ta bisa cu si e muhe wak’e, e ta pidi’e pa por fabor, bisa e berdad. Bisa loke a pasa, y no bisa mentira. E tin ruman, tin sobrina y tur cos cu e haci lo yega bek na su hendenan. No gaña y bisa berdad.
Jeaniris ta su nomber, segun Cortez y su nomber artistico ta Gaby. Ya hopi hende a papia cu Cortez di esey. Cortez no kier mete mas pasobra e tin cu lage den man di polis pa nan encarga di e caso aki. Cortez no ta ken pa bisa kico tin cu wordo haci. E ta laga autoridad actua, pero ta pidi Gaby di berdad y e ta haci’e pa su yiunan, pa e yiu muhe, pareha di Bremo, kende ta manera un yiu y tambe pa su nietonan, pasobra nan ta sufriendo. E muhe no sa e daño cu el a haci na e famia. Cortez ta pidi e muhe y si e kier, e ta busk’e y ta pidi’e na rudia pa e bisa e berdad. Cu e casa di e yiu muhe di dje, no ta un violado. Acepta cu e tabata tin relacion, pasobra un muhe cu a wordo viola, nunca ta pidi e agresor pa dune algo pa haci’e limpi of pa hibe su cas. Cortez ta spera cu autoridad compronde esaki. Bisa cual agresor ta bay hiba e victima na unda e ta biba.
Cortez ta pidi pa scuch’e. E ta haci’e pa su yiu, pa e tata di su nietonan. E mucha di seis aña, tur dia ta lanta madruga ta grita pa su tata. Dicon su tata no ta bin, dicon a cere. Ken el a mata. No ta husto cu un mucha tin asina un trauma den su cabez. E muchanan ta siñando di bida y no ta husto pa hiba un mal ehempel asina. Ta suplica Gabi pa bisa berdad, pasobra berdad semper ta bin dilanti.
Cortez sa cu loke cierto hende a bise cu unda e ta traha, cu e muhe aki ta un gañado y e tin hende di autoridad mes cu conoce bon. A bisa Cortez cu e persona aki conoce hendenan den cuerpo policial. Cortez no sa ken nan ta y ni ta interesa pa sa ken nan ta. Cortez kier pa autoridad haci e cos aki manera mester ta. E ta bogando pa su famia, pa su yiu, pa su nietonan. Nada mas. E no ta interesa bida di ningun hende, pero si e bida di su famia.