Autoridadnan ta en busca di un curpa cu varios persona a mira ta drif den e lama na costa nort di Aruba entre Boca Keto pa Daimari.
E hecho aki a keda registra rond di 12.30 di merdia. Diferente unidad di Polis y Brandweer a wordo manda na e sitio pabou di conchi. Segun por a compronde, a mira e curpa prome instante na Moro y a hay’e banda di Daimari.
Ta masha problema pa polisnan por yega, mirando e area rustico. Dado momento a dicidi di lanta e helicopter pa bay na e sitio tambe. Segun por a compronde, Park Rangernan tambe a mira e curpa ta drif, pero no por a haci mucho comokiera cu e ta un poco leu y lama ta basta bruto. Esey ta motibo cu a pidi ayudo di Kustwacht tambe.
Un ora despues cu a cuminsa cu e buskeda no a logra yega na e curpa ainda.
Update:
E informe oficial di Polis ta bisa lo siguiente: Awe pa mas o menos 12.21pm central di polis ta wordo notifica cu un homber turista lo tin problema den lama pabou di Conchi. Diferente unidad di polis a bay na e sitio di e sucedido y na unda na nan yegada a pidi di biaha pa ambulance y brandweer.
Mirando cu tawata dificil pa saca e persona for di awa a pidi ayudo di Guarda Costa cu a logra sake for di awa. Na e sitio a presenta departamento di recherche y slachtofferhulp.
Pa 3.55pm Dr.Texiere ta constata morto di Neftaly Torres 42 aña di edad nacionalidad Mericano.
Di parti Cuerpo Policial Aruba nos ta manda palabra di condolencia na e famia di e fayecido.