Alan Howell ta traha na bienestar di Aruba

0

Parlamentario Alan Howell durante conferencia di prensa di Fraccion di POR a indica cu e ta un persona cu ta traha duro na bienestar di Aruba y en especial di pariba di brug.
E ta indica cu el lo bay splica pueblo pakico cosnan a keda stagna na San Nicolas, pakico San Nicolas ta manera cu e ta awe y un di nan ta simplemente pasobra no tabatin un homber of muhe cu kier a traha cu alma y curason pa San Nicolas. E ta referi aki na e problemanan social unda cu solamente un persona cu kier hende bon lo por haci e trabou ey, un persona cu ta dispuesto pa scucha e problemanan y despues soluciona e problemanan ey. Tanten cu San Nicolas no tabatin e persona ey, e no por a bay dilanti.
Awor cu Alan Howell a haya e oportunidad pa ta parlamentario, e kier demostra cu e si ta bay lucha pa San Nicolas, cu e ta bay pleita, pone presion y zorg pa e cosnan sosode tambe. Esaki contrario na pasado unda tabatin parlamentario ta gaña tira un cos pa motibonan politico, pero e no tabata persisti pa logre. “Mi kier demostra pueblo cu mi a bin pa traha na bienestar di nos pais y mi a bin pa traha na bienestar di pariba di brug pa haci cada diferencia cu por haci y cu ta den mi man. Pueblo por conta cumi cu mi lo haci e diferencia”.
Howell ta keda pone enfasis riba e punto cu Parlamento ta e hefe di Gobierno y no vice versa, Gobierno no ta hefe di Parlamento. Si e parlamentarionan hoben den Parlamento por sigui manda e mensahe aki, den e 4 añanan di Gabinete Wever-Croes lo mira un gran diferencia den loke ta politica na Aruba unda lo keda demostra e manera cu mester ta, unda cu lo elimina e stempel parlement.
Un ehempel di esaki ta relaciona cu biblioteca na San Nicolas, unda cu Alan Howell a manda yama minister di Enseñansa den un vragenuur, independiente cu e ta forma parti di e coalicion cu ta sostene gobierno. Despues di esaki, ora e mandatario a contesta cu dos di e preguntanan aki ta dirigi mas bien pa minister di Infrastructura, el a manda yame pa otro vragenuur pa e duna cuenta riba e desaroyo di e biblioteca na San Nicolas. “Ta asina Parlamento mester funciona. E no mester funciona di e manera cu e ministernan ta wheel and deal manera cu nan kier. Como representante di pueblo ta bo deber pa controla gobierno. Por sostene gobierno na momento cu cos ta bon, pero na momento pa scrutina e gobierno, controla gobierno bo mester tey tambe, independiente di ki parti bo ta”, Alan Howell a duna di conoce. El a finalisa bisando cu e ta den Parlamento representando un pais y no un partido. Alan ta pone enfasis cu e ta bringa pa bienestar di Aruba y no di un partido. E ta haya cu como representante di pueblo mester kita e petchi di partido y bisti e petchi di pueblo.

Comments

comments