Parlamentario di POR, Alan Howell ta sumamente contento cu desaroyonan positivo cu ta tumando luga na San Nicolas, unda cu habitantenan ta hayando e atencion cu nan merece. E biaha aki e tabatin e placer y honor di tabata presente diahuebs mainta na momento cu e prome kiosko na Aruba Carnival Village and Entertainment Center a wordo entrega oficialmente.
Alan Howell ta conta cu Sra. Baptist tabatin e honor di haya e prome yabi di un di e kioskonan aki. Intencion pa cu e kioskonan ta pa e homber y muhe chikito tambe por tin nan propio negoshi y na mes momento trece mas movecion pariba y pa trece un tipo di ambiente anochi manera entre otro na Sandra’s y Hamaka cu ta na Playa. Howell ta indica cu tambe e chauffeurnan di bus y autobus por tin un luga pa por ehempel refresca un rato. “Un pabien na famia Baptist y nos lo sigui cumpli cu nos pueblo di San Nicolas. Esnan cu lo desea di aplica pa por yega na remarke pa un kiosko por haci esaki na DIP”, Parlamentario di POR a indica y a agrega cu siguientemente lo bay aloca fondonan pa crea un stage permanente na Aruba Carnival Village and Entertainment Center. Finalisando Alan Howell a gradici Minister Otmar Oduber pa scucha e peticionnan di pueblo di San Nicolas y tambe pa haci bon uzo di e fondonan cu Parlamento ta aproba pa proyectonan manera esaki.