TRIPOLI, Libia- Al menos 31 inmigrante a muri despues cu nan boto a sink diasabra dilanti costanan di Libia y 200 persona mas a wordo rescata pa Warda Costa y hiba pa un luga na e waf di Libia.
E migrantenan tabata den dos boto di awa dilanti e costa di Garabulli, oost di capital Libio y un di e botonan aki ya caba a zink ora cu autoridadnan a yega na e luga, segun, Abu Ajala Amer Abdelbari, comandante di Warda Costa Libio.
“E boto a zink y su pasaheronan tabata gespart ariba lama, purbando di landa yega costa. Tabata tin cerca di 60 persona mas di cual nos por a salba nan bida, door cu nan tabata teni na e restonan di e boto”, el a agrega. Otro 140 migrante a wordo rescata di e di dos boto, el a precisa.
E victimanan fatal, entre cual tin varios mucha, a wordo traslada pa un base naval di Tripoli.
Libia ta e principal salida di mayoria migrante Africano cu ta purba crusa pa yega Europa. Contrabandistanan hopi biaha ta hincanan den botonan inflabel cu frecuentemente ta bolter of ta zink.
Desde Juli, tabata tin un reduccion drastico di migrantenan cu ta purba crusa pero e siman aki un biaha mas e cantidad di salidanan desespera en busca di un bida miho a aumenta.
Casi 3 mil migrante a muri of a disparce den nan intento pa yega Europa e aña aki, den travesianan entre Libia y Italia. E Organisacion Internacional pa Migracion (OIM) a bisa diabierna cu desde 2000 Lama Mediteraneo tabata e frontera mas letal di mundo.