Willemstad Curacao: Dia 15 di sèptèmber Banko Mundial (World Bank) i Gobièrnu di Kòrsou a firma un Akuerdo di Kolaborashon (Memorandum of Understanding) ku e enfoke pa fortifiká relashonnan i promové interkambio di konosementu i ekspertisio/perisia riba áreanan di interes komun.
E Country Director pa e region di Karibe di Banko Munidal (Wold Bank) sra. Sophie Sirtaine a bini Kòrsou pa e seremonia ofisial di firmamentu. Gobièrnu di Kòrsou tabata representá dor di Minister di Desaroyo Ekonómiko, sr. Eugène Rhuggenaath.
Minister di Finansa, sr. José Jardim tambe tabata enbolbí den e proseso pa yega na e Akuerdo di Kolabroashon (MoU) aki. Ambos Minister tabata kontentu ku e MoU aki a keda firma ya ku esaki ta demonstrá e deseo di Kòrsou pa establesé relashonnan di trabou signifikante ku partnernan stratégiko internashonal ku por sostené Kòrsou su metanan di desaroyo duradero/sostenibel.
E promé dos proyektonan ku ta bai keda ehekutá bou di e MoU aki ya kaba ta den full swing/kanando. Banko Mundial ta bai yuda Kòrsou pa establesé un instituto pa desaroyo finansiero dor di fasilitá koperashon entre Korpodeko, Instituto di Desaroyo di Kòrsou (Curaçao Development Insititute/CDI) i Ontwikkelingsbank Nederlandse Antillen (OBNA) riba término kòrtiku i tambe integrá tur e tres institutonan aki den un organisashon den término largu.
Na di dos lugá Banko Mundial lo sostené Kòrsou pa krea un kuadro pa finansia proyektonan basá riba e prinisipionan di un sosiedat públiko i privá. Esaki ta un manera alternativo pa finansia i ehekutá proyektonan ku mas i mas ta keda uza rònt mundu i tambe ta un manera pa redusí e nesesidat pa finansia proyektonan grandi ku fondonan públiko. Komo resultado mas proyekto por keda ehekutá i asina oumentá e impakto ekonómiko.
Ounke ku Reino Hulandes ta un di e miembronan fundador di Banko Munidal, Kòrsou i Banko Mundial no tin un relashon di trabou di hopi tempu. Ambos Minister ta spera ku e MoU aki lo ta komienso di un relashon nobo i fruktifero, i ámbos Minister tin ekspetativa haltu di tur e benefisionan ku e koperashon aki lo trese pa Kòrsou. E MOU aki ta resultado di un trabou komo tim. Esfuersonan grandi pa Kòrsou tabata di parti di Ministerio di Desaroyo Ekonómiko, Ministerio di Finansa, Instituto di Desaroyo di Kòrsou (Curaçao Development Insititute/CDI) i e Direktorado di Relashonnan Eksterior. E Minister Plenipotensiario di Kòrsou na Washington, sr. Xavier Prens tambe a duna un aporte balioso na esaki. E ofisina di Country Director pa region di Karibe tambe tabata instrumental pa pone e proyekto aki sigui kana denter di Banko Mundial.