Aki tres siman lo tin inauguracion di Aruba Symphony Festival 2018

0
Reverón Piano Trio: Simon Gollo, fiyo; Ana Maria Otamendi, Piano y Horacio Contreras, Cello.
RBC Juli 2018
Funmiles-2018

Skirbi pa Clyde Harms

Den menos di tres siman, diasabra 21 di juli 2018, Aruba Symphony Festival ta inaugura su programa cu participacion di dos coro Arubiano hopi conoci bou direccion di Mayra Kock – Garrido: Cantare y Ars Nova. E di dos parti di e anochi lo ta na encargo di Reveron Piano Trio consistiendo di e internacionalmente famoso Simon Gollo, tocando fiyo, Ana Maria Otamendi na piano y Horacio Contreras, cello. E anochi ey e publico lo tende musica di diferente pais (incluyendo di Aruba), diferente genero y di diferente epoca.

Esaki lo ta di cuatro Aruba Symphony Festival y manera e otro tresnan, lo tin musico di fama internacional. Nos director Simon Gollo, via su conexionnan internacional, tur aña ta logra trece maestronan di fama di diferente pais. Dos ehempel: e maestro Randolph Kelly ta e tocador principal di viola di Pittsburgh Symphony Orchestra, posibelmente un di e dies orkestanan mas famoso na mundo y cu a gana un Grammy aña pasa. Kazuhiro Takagi, maestro di fiyo di Hapon ta concertmeester di cuater orkesta sinfonica na cuater diferente pais: Hapon, Korea, Merca y Alemania.

E Director di 2018 Aruba Symphony Festival, e Maestro Simon Gollo tin un invitacion pa bay toca y duna les na China na october, y lo no ta straño cu pa e Festival di 2019 un maestro y studiantenan chino lo bin Aruba. China lo ta e di 24 pais cu Simon Gollo ta bishita pa toca, dirigi orkesta of duna les. Despues cu Sr. Gollo a duna les y dirigi orkesta na Brazil recientemente, e organizacion aya a duna beca na tres hoben pa bin ricibi “masters classes” na Aruba.

2018 Aruba Symphony Festival lo tene conciertonan na cuater sitio: na Cas di Cultura, abordo di Freewinds, den Ballroom di Ritz Carlton y lo tin un Symphony Jam Session na Café Casibari. Entrada lo ta gratis pa tur concierto cu excepcion di e concierto inaugural y di clausura, y entrada lo ta solamente $20 pa persona.

Na e otro conciertonan lo tin un “donation box” camindo nos ta spera cu nos audiencia lo mustra nan aprecio pa e Festival.

Claudia Roa, e hoben pianista di Chile, ganado di e competencia entre studiantenan aña pasa, lo ta solista compaña pa Aruba Symphony Orchestra bou direccion di Simon Gollo den e programa di 27 di juli na Cas di Cultura. No perde e concierto aki! Nos ta kere cu e sala di Cas di Cultura lo yena e anochi ey. Claudia a toca den varios concierto na Chile despues di a gana e competencia aña pasa y a yena e sala cada bes.

E studiantenan e aña aki ta bin di ocho diferente pais y hopi a haya sa di amigonan. Nos ta spera cu comunidad Arubiano lo mustra nan aprecio pa musica di nivel y bin scucha nan. Nos ta orguyoso di ta yuda plama nomber di Aruba tur rond di mundo.

E concierto di clausura 29 di juli lo ta e expresion maximo di 2018 Aruba Symphony Festival. E maestro Simon Gollo lo dirigi Aruba Symphony Orchestra consistiendo di mas di 80 musico cu lo toca dos obra di Mendelsohn. E violinista hapones Kazuhiro Takagi lo ta e solista.

Durante e siguiente simannan nos lo publica mas detaye tocante 2018 Aruba Symphony Festival. Keda pendiente! Skirbi mi na [email protected] pa haya un copia di e programa completo.

Comments

comments

C: Heineken
new india