Recientemente AFC Ajax y Oficina di Turismo di Corsou (CTB) a extende e colaboracion entre e dos partidonan. For di januari 2020 Corso ta visibel como partner riba manga di e shirt di uniform di Ajax, e acuerdo aki lo continua te cu januari 2025. E acuerdo di partner oficial a keda extendi awo te cu 2027.
Cas Biesta, director comercial interino na AFC Ajax a indica: “Nos ta gradici Oficina di Turismo di Corsou p’e confiansa demostra. Ajax y Corsou, e ultimo añanan a conecta na otro na diferente manera. Banda di e echo cu e colaboracion tabata visibel den y rond di veld, e partnership a trece diference colaboracion na Hulanda y na Corsou. Nos ta sumamente contento cu prolongacion di e acuerdo p’e proximo 3 añanan. Nos ta ansioso pa comparti e hospitalidad y bon experiencianan cu nos tin di Corsou cu tur hende.”
Na su turno Muryad de Bruin, Counterpart Director na CTB a trece dilanti: “Cu e prolongacion aki nos ta completa e aniversario di 5 aña como partner, riba e manga di e shirt. E visibilidad di Corsou riba manga di e shirt icono di Ajax, a contribui internacionalmente na mas popularidad y aprecio pa nos bunita isla, tanto cerca esunnan cu gusta wak futbol y particularmente cerca e fanaticonan di Ajax. Entrante januari nos lo sigui como partner oficial y nos lo keda visibel na diferente manera den stadion, na television y riba e medionan social. Y nos lo sigui organisa campaña cu premio pa nos fanaticonan.”
