Diasabra awor, e grupo di studiantenan lo biaha di Aruba rumbo pa Hulanda pa continua cu nan estudionan.
Sr. Hendrick Croes di Aeropuerto ta splica cu e grupo ta consisti di 175 studiante cu e aña aki lo sali den un solo vuelo. Den e ultimo añanan tabatin dos fecha separa p’e studiantenan, pues esey tabata dos vuelo. E studiantenan lo biaha cu vuelo di KLM cu ta sali 5:45pm di Aruba rumbo pa Amsterdam. E studiantenan tin e oportunidad pa pasa check-in nan maletanan pa 2:00pm y haci e proceso di Happy Flow y imigracion.
Loke ta hopi importante ta p’e studiantenan percura cu nan passport ta valido p’asina evita contratiempo inecesario den e ultimo momentonan di stress. Tambe ta importante p’e mayornan sa cu no por para auto dilanti di Aeropuerto. E forma corecto ta pa parkeer den parkinglot, pues e dia aki ta bay tin un fluho hopi grandi di personanan y ta bay tin control stricto rib’e esaki. Ora e studiantenan pasa paden, lo bay tin un ceremonia chikito unda cu Prome Minister Evelyn Wever-Croes y Minister di Enseñansa lo dirigi algun palabra n’e studiantenan.
Por ultimo, Sr. Croes ta pidi tur persona cu ta biahando diasabra, no solamente e studiantenan, pa tene cuenta cu e dia aki lo ta extra ocupa dor di e studiantenan cu ta bay biaha.