Filomena College MAVO na San Nicolas a kibra e record, saliendo e miho scol pa loke ta e porcentahe di graduadonan. Un scol cu ta resorta bou di SKOA y nan a score masha bon mes. Ora puntra y analisa pa nan a bin cu’n resultado asina bon, e contesta ta e maestronan. Minister di Enseñansa, drs. Rudy Lampe, tabata presente na e graduacion.
E maestronan a sacrifica nan diasabra y te hasta diadomingo, pa duna guia special na e studiantenan. El a paga. Aworaki nan a bira e campeon di Aruba, pa loke ta e porcentahe di graduadonan. No solamente e alumno y nan mayornan, pero specialmente e maestronan cu a bay un extra mile. Esaki ta di elogia, pa nos maestronan.
Tambe e mandatario tabata presente na Ceque College, cu tabata tin e miho graduado di Aruba. Y esey tambe ta danki na e contribucion di nos maestronan, cu ta traha bou di circunstancianan dificil. Ora cu wak e klasnan chikito di Ceque College, cu ta un situacion di transicion e ta, bayendo pa haya un scol apropia, toch el a produci e miho graduado. Esaki kiermen cu nos maestronan a haci un esfuerso, a pesar di e situacion di e infrastructura, no adecua, toch nan ta haciendo un bon trabao y esey ta di admira. For di awo e mandatario kier a desea tur e maestro y alumnonan, un bon vakantie, bon mereci.
Di otro banda, resultadonan mester mehora. Si wak p.e. Colegio San Nicolas, en berdad, tin diferente otro scolnan pa diferente otro circunstancia, e biaha aki no a score manera nan tabata score den pasado. Pero mester tuma e ehempel di Filomena College, MAVO, cu tambe tabata tin su momento di crisis, pero awo e ta na top. No mester desanima. Mester analisa con por yuda mehora e resultadonan, pasobra cu nan t’ey pa traha pa nan muchanan, pa nan hobennan, pa nan futuro.
Un di e puntonan cu p.e. a keda treci na Colegio San Nicolas, un di e factornan, ta e factor social. berdad ta cu cada biaha e situacion na klas, pa sobrevivi, ta bira mas dificil. E ora ey, tempo cu mester bay pa estudio, mester bay pa otro actividadnan di sobrevivencia y pa atende cu e retonan den famia y den casnan. Esey kiermen cu enberdad ta un di e factornan cu mester tene na cuenta cu bida no ta facil pa hopi di nos famianan, segun Sr. Rudy Lampe, minister di Enseñansa.