Parlamentario pa fraccion di AVP, Sr Richard Arends a mustra cu el a manda un serie di pregunta na Prome Minister Evelyne Wever Croes, relaciona cu e blokeo comercial imponi pa Gobierno di Venezuela, Nicolas Maduro.
“Siman pasa mi a haci un peticion na Prome Minister Evelyne Wever Croes, pa bin duna un splicacion riba e situacion actual, y bin duna un up-date, riba e situacion cu Venezuela den un ‘vragenuur’.
Mirando e complehidad di e situacion, no ta necesario pa bin cu contestanan por escrito.
Pero te awe, un situacion cu ta basta urgente y mirando cu ainda e blokeo comercial ta existente, ainda Parlamento no a haya un splicacion oficial di gobierno.
10% di balor di e fruta- y berduranan cu ta wordo importa, ta bin for di Venezuela. E efecto comercial, no solamente aereo y transporte di persona y importacion di fruta y berdura, ta basta substancial.
Mas y mas nos ta wak relatonan di prensa, cu ta wordo publica tanto local como tambe den prensa Hulandes, cu ta mustra cu e islanan no por wordo culpa di no a tuma e medidanan di precausion necesario of di no a controla e fronteranan manera mester ta.
Maske cu gobierno kier a tira culpa di e blokeo aki riba gobierno anterior, esta gabinete Mike Eman II, mas y mas ta sali na cla cu ningun di tres islanan por a preveni e situacion cu nos ta bibando aden na e momentonan aki.
Esaki ta analisisnan cu ta sali for di informacionnan obteni pa periodistanan for di ministerio di Relacionnan Exterior di Hulanda.
Tin cu mustra cu nos como Parlamento, ta keda den un incertidumbre, nos no sa kico ta wordo negoshi, kico ta e rol di diferente paisnan.
Mi a carga responsabilidad como Parlamentario y bolbe manda un peticion via Presidente di Parlamento pa por manda Prome Minister un recordatorio si e por bin duna un splicacion den Parlamento.
Spera cu Gobierno duna oido na e peticion aki,” sr Richard Arends a declara.