Sindicato STA ta lamenta cu ya ta 3 siman caba cu no a tende nada di parti di gobierno pa loke ta e comision cu mester a lanta pa trata e planta na dump segun Sr. Diego de Cuba.
Despues di e encuentro cu e ministernan na Parkietenbos, a keda palabra cu nan lo trece un persona aden cu sa di electricidad pa cu e planta aki, pa wak con ta start e up. Y a keda palabra di haci un limpiesa di full e planta.
Lamentablemente, despues di esaki STA no a tende nada mas di esey. Sindicato tabata tin algun tarea pa eherce. Pero esaki tabata a base di e rapportnan, y te aworaki no a haya niun feedback mas ni di parti di gobierno y ni di parti di Serlimar.
Den e siman cu ta bin, segun Sr. de Cuba, sindicato lo pidi un reunion cu gerencia di Serlimar, y cu Minister Mike de Meza, pa sa con ta para cu e situacion di Parkietenbos.
Ta existi un bruhacion di varios aña, ya cu ta hopi tempo e planta a keda para eynan. Ta hopi cos mester wordo evalua prome cu start e up. E acuerdo tabata ta cu lo no start e planta up den full fase, pero den diferente fase. Y e posibilidad aki t’ey.
A pidi un evaluacion riba e pida ey, ya cu si mester pidi un evaluacion di full e planta, esaki lo mester bay den fase. Ta e pida ey, unda cu lo por shred mata, desperdicio di naturalesa, un 15% cu lo por wordo procesa door di e planta aki.
Segun Sr. de Cuba, tur hende sa cu e start up ta costa placa pero ta gobierno ta esun cu mester zorg pa esaki. Sindicato ta bogando pa un solucion, pero uno duradero. Sindicato no ta sigur si gobierno lo bay inverti den e start up di e planta. A tende hopi grito di parlamentarionan tocante di Parkietenbos, ya cu tin preocupacion den comunidad, vooral den Simeon Antonio y vecindario.