Ainda esnan interesa por inscribi pa e Hadicurari Lionfish Challenge di 2016. Tin un (1) siman ainda y ekiponan por inscribi y entrega Lionfish ainda pa purba gana e mas di 2000 florin na premio cu ainda a keda disponibel pa e ultimo parti di e torneo aki. Te cu diasabra awor 26 di November 2016 ainda teamnan por entrega nan Lionfish invasivo cu nan a yuda controla for di nos awanan. Directiva di Fundacion Centro di Pesca Hadicurari ta contento di por a uni forsa cu otro instancianan manera Aruba Reef Care, Aruba Marine Park Foundation y Jolly Pirates pa haci e luna di concientisacion di Lionfish uno productivo y exitoso.
Fin di siman yen di actividad rond di Lionfish
E fin di siman venidero ta e gran final di tanto e reto di Lionfish di Hadicurari y e luna di concientisacion di Lionfish. Diasabra ta e gran final di e torneo, unda for di 2’or di atardi piscadonan lo ta treciendo Lionfish aden na e beach dilanti di e pier di Hadicurari, entre Holiday Inn y Marriott Surf Club. Diasabra 26 di November for di 1’or te 4’or lo tin un cook out unda lo ta ofreciendo lionfish pa purba na publico. Pa 4’or di atardi lo tin entregamento di premio na e ganadornan como tambe coronando e team campeon di Aruba.
Recaudacion di fondo diadomingo anochi
Diadomingo 27 di November pa 7’or di anochi lo tin na Nos Clubhuis di Hadicurari e di tres Lionfish and Wine Tasting fundraising event, unda door di contribui cu un ticket di 50 florin, bo por saborea bocadiyonan di 5 chef creativo, acompaña pa nan biña cortesia di Wine and Dine y Romar Trading. Pa ticket of mas informacion por acudi na oficina di Jolly Pirates Aruba na Moomba Beach Club. Ta invita un y tur pa yuda combati Lionfish door di catch, cushina of come Lionfish y asina conclui e luna di concientisacion aki exitosamente.