Segun Parlamentario di AVP sra Arends-Reyes kende a fungi varios aña como presidente di comision di Turismo pa Parlamento di Aruba, nos ta den luna di Februari 2018 y ainda Parlamento no a ricibi un presentacion tocante Turismo y especialmente ariba e pregunta si lo mantene e planan pa 2018 di ATA. ATA a presenta nan Corporate & Budget Plan pa 2018 prome cu eleccion y den dj’e nan tin un presupuesto di mas o menos 100 miyon florin pa traha cun’e den 2018. Fuera di tin un Emergency Fund cu ta na 22 miyon florin.
ATA y verrekening cu Financiën
Por a tuma nota cu te ainda ta ser menciona den medionan di comunicacion cu e gobierno anterior no a paga ATA 22 miyon cu mester a caba di paga den 2017 na tempo, siendo cu a conta mitar storia, cu en realidad no ta gobierno directamente pero ta Financiën ta e profesionalnan cu ta verreken tur suma pa e cashflow di pais no pega. Sra Arends-Reyes a comprende cu ATA tambe tawatin algun suma pendiente pa Financiën y ta eynan a verreken y na final a duna ATA e diferencia.
Critica ariba ATA
Ta bon pa corda cu tanto añanan anterior como tambe durante e ultimo campaña electoral e Minister actual su palabranan literalmente tawata cu ATA su maneho tawata ineficiente, pueblo no a wak e placa cu a ser inverti pa mercadeo di Pais Aruba, y puntra ta ken lo ta responsabel pa e maneho ineficiente, si ta e Minister anterior of e directora. E atakenan aki directamente ariba e entidad di ATA, no tawata husto mirando cu den tempo bon y menos bon a yuda contribui grandemente pa nos tourism receipt a yega casi 3 biyon. Siendo cu anteriormente no tawata yega ni serca di e suma aki. A priminti cu si vota pa e actual Minister lo bin cambio drastico pa cu e maneho di ATA y ta netamente pesey ta importante pa Parlamento keda na altura di tur e desaroyonan.
Sur America
Fuera di e preocupacion anteriormente menciona locual cu ta keda un punto di atencion ta e region Caribense y Sur America. Na e momentonan aki Aruba a conose un embargo di parti di Venezuela cu por ehempel pa December 2017 a representa 9% di e 18% di nos mercado di Sur America y tin varios aerolinea cu ta conecta paisnan den region Caribense cu ta experienciando dificultad of cu ta grounded. Lo ta interesante pa sa kiko ta e plan pa cu Sur America mirando cu ta inverti basta fondo di mercadeo pa e region aki. Si kita Venezuela di e panorama e otro destinacionan di Sur America huntu no ta yega mas cu 10% di e marketshare. Mester percura pa Aruba keda competitivo, acesibel y hasi mayor esfuerso pa percura pa Aruba no sufri di e circumstancianan aki mirando cu nos tin un dependencia asina halto ariba Turismo.
Cifras di Centrale Bank
E Revpar cu ta un di e indicadornan fuerte pa nos calidad di destinacion na e momentonan aki ta na 263.44 USD, siendo cu por ehempel esun di Korsow ta na 100 USD. Ta un hecho cu bou di maneho di ATA y partido AVP e REVPAR a aumenta substancialmente te yega den topnan di Caribe.
E contribucion di Turismo pa e segundo kwartal di 2017 cu ta e tourism receipts, locual ta drenta como entrada a aumenta cu 6.3% compara cu 2016 cu a yega na un suma di 712.9 miyon florin compara cu 670.8 miyon florin na 2016 sra Arends-Reyes ta termina bisando.