Entrante 1 di juli Fundacion Pa Nos Comunidad (FPNC) a tuma e proyecto di ayudo pa cuminda pa famianan cu ta den necesidad. Pa e motibo aki a haya nan mes ta splica un biaha mas con e procedura ta bay. Contrario cu tempo di Cruz Cora, awo no ta bay entrega un voucher sino un pakete di cuminda.
Gianaika van der Biezen, director di e fundacion, a splica cu despues cu nan a haya e tarea aki, a sinta cu Cruz Cora pa planifica esaki mas miho posibel. Importante den e proceso aki tabata pa evita cu ta comparti informacion personal di e famianan. A haci e proceso via un sistema unda tur hende ta haya un code via Cruz Cora riba nan celular. Y cu esaki nan por aplica y registra online pa ricibi pakete di cuminda.
A traha tres video den tres diferente idioma, Papiamento, Spaño y Ingles, den cual ta splica tur hende con nan mester registra. E registracion a tuma luga entre 7 pa 13 di juni ultimo. Despues a bolbe a e oportunidad durante un siman pa registra debi cu e demanda tabata hopi halto y tabatin famia cu no a logra registra den e tempo cu a pone inicialmente. Tin casonan cu nan a hasta bay na cas di e hendenan pa nan no keda afo di e programa di pakete di alimento.
Recientemente Cruz Cora a informa FNPC cu entrante dia 18 FPNC no lo tin acceso na e carchinan mas. Esaki a pone cu nan mester a cambia e planning y pidi tur persona via di social media cu a registra pa acudi na FNPC cu nan carchi pa nan scan esaki y mira berdad cu esaki ta pertenece na e persona cu a registra. Esaki ta un di e criterianan stipula pa sigura cu tur esnan cu a aplica berdad tabata haya ayudo di Cruz Cora.
Ultimo aki a haya informacion di Cruz Cora cu lo extende e fecha di 18 pa 31 di juli, cual lo permiti of duna FPNC suficiente tempo pa sigui cu e screeningnan.
Ta di nota si cu tin hende cu a ordo gescreen caba y no a bin busca nan carchi. FNPC a haci un peticion na e hendenan cu a aplica y cu no a wordo yama ainda pa tene pasenshi ya cu esaki lo tuma luga den e proximo dianan. E proceso ta bay mas facil si a upload tur e documentonan pidi ora di yena e formulario. Si falta documento, e cliente lo haya un yamada pero e lo tarda e screening tambe.
Nan ta compronde cu e pandemia tabata largo, pero mester di e documentonan al dia. Pa e personanan cu a perde trabou y tabata haya Fase, ta pidi pa trece un comprobante di esaki. Esan cu ta haya FASE, lo haci un evaluacion cuanto ta resta pa cumpra cuminda y cuanto ayudo lo mester.
Awo ta bay cuminsa cu e fase di bishita di control na casnan, di esnan cu a haci peticion.
E ayudo cu ta duna ta den forma di n voedselpakket. Durante pandemia cu hopi luga tabata cera, a opta pa e sistema di voucher cu tabata mas facil. Pa e motibo aki a bay haci uzo di loke nan ta yama un “nood voedselpakket”, y di e forma aki ta garantisa cu no ta haci mal uzo di e vouchernan mas.
E regla awor ta cu e persona cu haya e ayudo ta esun cu mester busca e pakete di cuminda. Esun cu tn un deshabilidad, por hibe te na cas, pero ta entrega esaki cerca e persona concerni. Pa mas informacion por comunica cu FNPC, na 5880002 of por bishita nan localidad nobo na Sero Blanco 14-A of na Kibrahacha di 8:00 am pa 5:00 pm.