Dia 1 di Juli ultimo Banco di Seguro Social di Aruba , SVb Aruba , a introduci oficialmente algun cambio den su maneho. Na momento cu e directiva di Aruba Hotel & Tourism Association (AHATA) a nota un necesidad pa mas informacion encuanto di e topico aki, e asosiacion a organisa un seminario hunto cu SVb den Alhambra Ballroom pa duna tur miembro e oportunidad pa ricibi e informacion corecto y haci pregunta riba tur topico relaciona cu e servicio nan di SVb y nan relacion cu e organisacion.
Ojo ma haci hopi cambio den e parafo aki: CEO di AHATA, Jim Hepple a splica cu ora e miembronan expresa interes special den un topico(nan) AHATA ta organisa sesion(nan) di informacion of seminario(nan) basa riba e topico(nan) aki. Esaki tabata e prome seminario cu AHATA a organisa cu SVby a conta cu participacion activo di 60 di e 90 miembronan di AHATA.
Un total di 23 di e miembronan ta hotel mientras e otronan ta banconan, tiendanan, companianan di accounting, operadornan di tour, restaurantnan y aeropuerto, entre otro. Mayoria participante ta esunnan cu mas tin di haci cu e ley aki den e organisacion, esta e coordinadornan di Recursonan Humano.
Tanto AHATA como SVb a keda satisfecho cu e participacion y cantidad di pregunta cu por a keda contesta sea den e presentacion of durante di e sesion di “Q&A”. Jim Hepple a remarca cu Director di SVb, esta Ir. Edwin Jacobs a coopera hopi bon cu e asociacion; y AHATA ta contento di por presenta pa su miembronan un seminario cu informacion clave pa cu nan funcionamento.
Durante di e seminario Edwin Jacobs a introduci tambe e vision di SVb pa 2020, cu ta dirigi riba e organisacion su compromiso pa ta accesibel 24/7, pa ta transparente y presenta un organisacion mas simplifica, tanto pa e trahado como e dunado di trabao. A recorda tur presente cu e “ziektemelding” tin orario cu oranan di telefon extendi, esta di 7’or di mainta pa 12’or di merdia y di 1’or di merdia pa 4’or di atardi. Tin 6 liña disponibel pa e proceso di ziektemelding, cual antes tabata tuma luga solamente den oranan di mainta.
E posibilidad tambe ta existi actualmente for di 1 di September pa empleadonan “meld ziek” pa medio di e website di SVb. E formulario ta disponibel online y empleadonan por yen’e entre 7’or y 10’or di mainta, despues di 10or di mainta mester meld via di telefon 527-2782.
Relacionista Publico di SVb, esta Cherryldine Buckley a agrega cu loke si e trahado mester corda ora e yena e formulario online, ta cu e mester bin SVb pa control riba e di tres dia, esta si e ta sinti malo ainda y cu pa corda meld serca e doño di trabo tambe. A duna di conoce cu tin diferente formulario manera entre otro e peticion pa e declaracion di trabo pa entrega na DIMAS pa e trahado, ta disponibel awo “online” via di e website di SVb. E topico principal tabata cambioo di e “premieloongrens”, pero tabatin tambe preguntanan tocante e multanan cu e keda introduci, e posicion di dunado di trabao pa cu e “losse arbeider”, part-timernan, etc. El a añadi cu pa cualkier pregunta, tanto di parti di e trahado como e dunado di trabao, SVb ta disponibel via di telefon tambe, y tur informacion ta riba nan website of por manda e-mail na [email protected]..
Na September 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.