Pa Aruba Hotel and Tourism Association e vigilancia di e mercado turistico y e trendnan, e necesidad di nan clientenan y mantene un posicion y actitud proactivo ta hopi importante. Basa riba e necesidad di nan miembronan y e empleadonan di nan miembronan y mirando desaroyonan localmente y internacionalmente, AHATA ta ofrece su miembronan diferente presentacionan y tayernan educacional durante aña.
Dia 2 di November, AHATA a ofrece un tayer di full dia, educacional, interactivo, sin costo alguno pa su miembronan, titula “Employee Engagement”, esta “Compromiso di Empleado”, cu a wordo facilita door di Mrs. Esther Baaij & Vivian Mc Donald expertonan den e materia di Human Capital Consultancy, Learning and Assesment di Deloitte.
Vivian Mc Donald ta splica cu durante e tayer principalmente nan a ofrece tips riba con pa motiva empleadonan pa sinti nan mes mas comprometi y envolvi cu su organisacion.
Mc Donald a agrega cu hopi biaha e empleadonan ta contento cu nan trabao y e negoshi, pero esaki ta te un cierto grado, y cu e consehonan ofreci na esunnan encarga lo por logra yega na un situacion di envolvimento mas amplio.
E gerente encarga cu recursonan humano pa Maggy’s, esta Marcelo G. Profet tabata entre e participantenan, y a splica cu e “engagement” cu nan a combersa tocante di dje ta bay mas leu cu presencia di 8 pa 5. E ta concerni e necesidad pa tin un compromise y sinti di ta parti di un compania.
Profet a remarca cu nan a ricibi tips con pa aplica diferente tactica y puntonan pa tene cuenta cun’e ora ta trata cu e empleadonan, y con pa haya nan participacion atrobe of logra un envolvimento mas amplio. Esaki ta inclui tambe participacion den e metanan di e compania, y con pa logra cu e empleado di berdad ta sinti su mes contento cu su compania, cu e ta pertenece y ta gusta locual cu e ta haci.
E meta ta pues pa logra un situacion win-win, unda cu e empleado ta contento y envolvi, y e ta participa na yuda e negoshi logra su metanan, Profet a conclui bisando.
Durante e tayer a conta cu participacion di diferente gerente cu ta encarga sea cu gerencia general of di recursonan humano, pero tambe cu director di operacionnan, entre otro. Un danki grandi na Esther y Vivian pa nan profesionalismo y dedicacion na e tayer aki y tambe masha danki na tur miembro di AHATA cu a participa activamente y cu hopi entusiasmo.