AHATA: “Leynan laboral mester por inspira productividad, pa por tin mas cupo di trabao”

Un di e preguntanan mas grandi ultimamente ta pa cuanto tempo mas lo ricibi loonsubsidie na 2021, dus ainda no sa cuanto luna di esey lo por ricibi na 2021, esey ta keda na mesun nivel. Claro tabata un ayudo grandi pa hopi compania pa 2020 cu por a mantene bastante empleado cu trabao. E debate di mas grandi, pero e reforma di mas importante of cu mas urgencia segun Presidente y CEO di AHATA, Tisa la Sorte ta e reforma di ley laboral, tambe tin otro reforma manera esun di belasting [tax reform].

E tipo di reformanan ey ta yuda cu bo ta duna un economia mas dinamico, un mercado di labor mas dinamico pasobra ora bo tin esaki bo ta crea mas cupo di trabao eventualmente. “Esey nos ta spera cu enbes di pensa e manera cu nos semper ta pensa pa hopi aña cu ley laboral mester defende of mantene e persona na e trabao specifico ey, cu e leynan laboral al contrario mester por inspira productividad, y esey ta e ora inspira mas cupo di trabao na bo disponibilidad.”

Pero e ora e persona su responsabilidad pa duna su mes siguridad di trabao, ta pa ta un persona productivo cu ta crea balor pa su compania of trabao. E ta un pensamento cu nos mester pensa segun sra. La Sorte na unda nos mester enfoca mas riba kico nos ta contribui enbes di kico otro ta primiti nos.

E prioridad ta pa sali di e contagio di e virus, dus esey ta un di e prioridadnan tambe y p’esey no ta por nada gobierno ta keda pidi hende pa cumpli cu e reglanan. Na 2021 e ta sigui importante pa keda cu e distancia social y uzo di tapaboca, pa nos keda realisa cu nos cada uno ta participa den e posibilidad pa nos por recupera nos economia, y kita e peso di cuido medico cu mester tin den nos comunidad.

“Si nos tur participa y tin disciplina, nos tur por sali di esaki mas lihe posibel pa bay bek na un bida mas normal mas lihe posibel tambe,” segun sra. La Sorte.

 

Comments

comments