16 juni 2023, Aruba Hotel & Tourism Association a introduci un programa di premiacion pa reconoce companianan responsable cu ta priorisa mehoracion di nos comunidad. Un panel di hurado independiente, consistiendo di 5 persona profesional, a revisa 37 aplicacion impresionante di compania cu ta dedica na crea impacto positivo den comunidad y no solamente na nan meta financiero.
E hurtado a crea criteria oficial pa escoge un ganado den 4 pilar di sostenibilidad, y asina reconoce nan esfuersonan excepcional na bienestar di nos isla:
-Bucuti & Tara Beach Resort a gana AHATA Impact Award pa “Proteccion di Medio Ambiente”.
-Divi & Tamarijn Beach Resort a gana AHATA Impact Award pa “Inversion den caridad”.
-Bodegas Papiamento a gana AHATA Impact Award como “Campion pa Cultura”.
-La Cabana Beach Resort a gana AHATA Impact Award pa “Desaroyo Bienestar di Empleado”.
Durante un Asamblea General di Miembro, Presidente y CEO di AHATA, Tisa La Sorte, a entrega un obra di arte di artista Gilbert Senchi, na e 4 ganado den presencia di ehecutivonan den industria di turismo y minister di Turismo y Salubridad Publico, Sr. Dangui Oduber.
AHATA ta orguyoso di e dedicacion inmenso di e ganadornan y ta gradici tur compania cu ta inclui metanan di sostenibilidad den nan plan anual y ta tuma accion pa contribui na cambio positivo den nos comunidad. Cu e exitoso programa di AHATA impact Award, e asociacion di turismo a logra un meta principal pa apoya comercio cu tin maneho sostenibel y ta spera di por inspira mas participacion y dedicacion di mundo comercial na practicanan di impacto.
E panel di hurado, cu a dedica nan tempo y conocemento na e programa di premiacion, a consisti di: Daniel Tecklenborg – Director di CEDE, Rasabelle Illes-PHD den Psicologia y miembro di facultad di Universidad di Aruba, Jan Noordzij – Director di Advance Human Resource Services, Francielle Lacle – Advisor di Desaroyo Sostenibel, y Ray-Anne Hernandez, Director di UNOCA.