AHATA contento cu a pasa ley riba saconan di plastick

Astrid Muller di e comision di Medio Ambiente di AHATA, a splica nan pensamento riba e ley di saco di plastick, cu sigur ta positivo pa nos pais.

E ley aki a pasa algun luna pasa den Parlamento y AHATA kier concientisa publico en general como tambe e sector hotelero, e empleado y huespednan, tocante di e ley cu ta bay ta na vigor na comienso di Januari y cu kier a bisa cu ta sumamente contento cu e ley aki a pasa, cu a wordo aproba, pasobra cu di parti di AHATA su comision di medio ambiente, a haci hopi concientisacion den pasado, tocante di tasnan reusabel pa wordo uza, loke ta miho pa nos medio ambiente y vooral pa e bida marino cu ta haya hopi molester di tur e saconan di plastick cu ta bula rond. AHATA ta hopi contento cu awor ta asina leu y kier a cuminsa desde awo, pa concientisa tur hende pa haci nan esfuerso pa dia 1 di Januari, tur hende ta mas conciente cu nan tin nan tasnan reusabel den auto, unda cu nan ta bay y tambe ta bisa semper pa bisa no. Si bo tin ya caba un otro saco, bo no tin mester di mas saco acerca. Kiermen por hinca un den otro, y nenga pa no haya otro saco of si ta papel of otro tipo di saco. Y tambe tin hopi tas reusabel cu por wordo uza, vooral esunnan cu por dobla chikito. Semper tin algo hunto cubo y tin cu agrega cu tabata tin hopi aña pasa, AHATA a traha algun di e tasnan cu tabata promove na diferente supermercado, na diferente location y a haci propaganda pa esey. Pero e temponan ey no tabata cla ainda pa e ley bin na su luga, pa motibo cu sin ley e ta dificil pa bo por reenforsa, loke mester wordo reenforsa, segun Muller.

Di parti di AHATA ta bay haci tur esfuerso pa concientisa e empleadonan di tur e hotelnan, timeshare, condo’s y tambe e huespednan, vooral di parti di timeshare, cu ta haci hopi compras na supermercado y pa nan ta al tanto prome cu nan bin Aruba cu esey ta bay ta pasa dia 1 di Januari, riba e ley nobo pa nan ta na altura y pa nan bin cu nan tas of nan ta cumpra un tas reusabel. E ora tur hende por yuda nos pa aporta na nos medio ambiente y poco poco ta bay wak un diferencia hopi grandi den nos naturalesa y den nos medio ambiente, segun Muller.

 

Comments

comments