Aruba Hotel & Tourism Association (AHATA), via su Comite di Medio Ambiente, a organisa tayernan dinamico y interactivo pa sigui empodera lidernan den e sector di hospitalidad cu mas conocemento den practica responsabel ora di cumpra material y producto.
E sesionnan tabata dirigi pa Juliet Carvalhal, e motor patras di Impact Blue y un di e experto di Aruba den ley di plastic. Participantenan tabata consisti di representantenan di departamento di compra, financia, operacion, y director di diferente compania miembro di AHATA. Den cada sesion a ser combina presentacion, wega educativo y intercambio di ideanan. Participantenan a haya herment practico pa implementa y keda desaroya nan sistema di procurement responsabel, y pa tin mas conocemento tocante regulacion local.
Un elemento clave tabata e lansamento di un toolkit desaroya pa Impact Blue specialmente pa e tayer. E toolkit ta inclui guia riba materialnan suplente y varios recomendación.
AHATA ta gradici Juliet pa comparti su experticio y na e miembronan di Comite di Medio Ambiente di AHATA — Armand Ruiz, Environmental Health & Safety Specialist di Tropical Bottling Company, Urvin Leest, Cross Division Manager di De Palm Tours Corportation, y Ryan Bareño, Director of Operations di Marriott’s Aruba Surf Club pa comparti nan experiencia y conocemento valioso durante e panel. E panel informativo tabata dirigi pa Crescenzia Biemans, Chief Corporate Officer na Bucuti & Tara Beach Resort. Vanessa Rasmussen, lider di AHATA su Comite di Medio Ambiente, a expresa satisfaccion pa e interes sincero di tur participante.
E tayernan, cual a tuma lugar na Eagle Aruba Resort, ta un paso mas pa empodera e sector turistico di Aruba representa un modelo sostenibel y resiliente.
