TEXAS/TIJUANA- Agentenan di e Patruya Fronteriso di Merca a lansa spray cu gas pimienta contra di migrantenan Centroamericano, algun di nan cu muchanan chikito. E migrantenan aki a purba crusa e cura na frontera cu ta separa Tijuana (Mexico) di teritorio Mericano.
Cerca di 20 migrante, yuda pa un cabuya improvisa, a purba subi e baranan lanta ariba e beach pero esakinan a wordo aleha pa e agentenan di Border Patrol, cu desde 1 di januari no a haci uzo di gas pimienta, ora cu’n otro grupo di migrante cu a bin den un caravana a purba crusa pa teritorio Mericano.
Esaki ta e di tres biaha den un siman cu gruponan Centroamericano ta bula pa teritorio Mericano, unda cu despues di wordo deteni nan ta pidi refugio, argumentando cu nan bida ta core peliger door di violencia den nan pais.
Den e prome ocasion, siman pasa, 50 migrante a logra crusa, y diamars otro 10 migrante a crusa. Tur a wordo deteni pa e Border Patrol.
Den e ultimo lunanan, miles di Centroamericano a yega Mexico den varios caravana, cu e soño di crusa pa Merca en busca di un miho bida.
Presidente Mericano, Donald Trump ta considera e migrantenan aki un menasa pa e siguridad y a insisti di cu Congreso di su pais autorisa recursonan pa construi un muraya na e frontera.