Diahuebs mainta a tuma luga den Corte di Husticia di Prome Instancia, e sentencia contra di e agente policial B, acusa di desfalco y tambe di violacion.
Pa loke ta trata e desfalco, B. tabata wordo acusa di no a entrega municion bek na su superiornan despues di training y laga nan, deliberadamente den su locker na warda di polis. Pero esaki pa hues no a keda proba y pa cual el a wordo vrijgesproken di e caso aki.
Pero pa loke ta e otro acusacion, di violacion, aki si hues a baha pisa ariba B, bisando cu B a haci mal uzo di su posicion di polis pa asina abusa di e dama M. Segun hues, e acusado a bay te na unda e dama ta kedando, haciendo mal uzo di su posicion di polis y bou di pretexto di hib’e warda di polis a bay cu e dama na un luga bandona y asina forsosamente a tene relacion sexual cu e dama.
Door di e acto bochornoso aki, segun hues, e acusado a mancha e integridad di e dama y tambe haciendo mal uso di su poder como agente policial, e ta tira un mancha negativo tambe ariba Cuerpo Policial di Aruba (KPA). E hecho cu B. ta mantene su palabra cu e dama M. ta un prostituta, pa hues ta un indicacion serio cu B. no ta reconoce cu el a haci algo malo. Esaki a crea cierto miedo den e dama M, cu el a tarda pa entrega denuncia.
Por lo tanto hues a sentencia agente policial B. na 4 aña di prizon, kitando e tempo cu el a pasa den aresto preventivo.
Presente den sala di Corte tabata t’ey famianan di B., cualnan a keda visiblemente afecta pa e sentencia di hues.