Diamars dia 5 november Prome Minister Evelyn Wever-Croes a reuni cu UNHCR cu ta e agencia di Nacionnan Uni pa refugiadonan. Durante e reunion, señor Jose Egas, representante di UNHCR, a presenta su credencial na Prome Minister pa asina e por opera pa e region di Aruba. Gobierno di Aruba a acredita UNHCR pa ta presente y asisti gobierno den tur reto riba tereno di refugiado. Señor Egas ta staciona na Panama y di eynan ta dirigi e trabounan den e region.
A trata di un reunion importante ya cu ta esencial pa keda den dialogo cu UNHCR riba retonan grandi cu Aruba ta confronta riba tereno di migracion. Desde cu Gabinete Wever-Croes I a sinta na aña 2017 tawata existi un crisis migratorio unda paso a paso Gobierno mes a profesionalisa y introduci un sistema di asilo unda UNHCR ta yuda Gobierno mehora esaki.
Un tema importante cu a toca durante e reunion ta e echo cu UNHCR recientemente a publica un estudio den cual nan a conclui cu 1 den cada 5 persona cu ta biba na Aruba ta un refugiado. Riba esaki Gobierno di Aruba no ta di acuerdo cu UNHCR. E interpretacion di UNHCR di un refugiado na Aruba ta tur hende cu no a nace na Aruba y a bin biba na Aruba, of esnan cu tin permiso of tin hopi aña ta biba na Aruba, y talvez ya a nacionalisa, pa UNHCR, esey ta e grupo di refugiado na Aruba.
Pa Gobierno di Aruba, e definicion di un refugiado ta diferente. Segun tratadonan internacional cu Aruba ta aplica, un refugiado ta un persona cu ta bandona su pais, huy pa su bida y ta busca proteccion den nos pais. Esnan cu haya e proteccion na Aruba, pero hasta si papia di esunan cu ta busca proteccion, e cifra actual ta di alrededor di 1000 persona cu tin un peticion pa asilo pendiente, y 1000 persona no ta ni 1 % di e poblacion di Aruba. Nificando cu no ta 1 di cada 5, pero 1 di cada 100 persona por wordo considera un refugiado na Aruba.
“Pa Gobierno di Aruba ta di gran importancia pa señala y aclara e diferencia aki pasobra e publicacion di UNHCR a hala hopi atencion y preocupacion na Aruba y na Hulanda. Pero manera mi a indica, UNHCR tin un definicion di un refugiado cu nos no ta di acuerdo cu ne. Mi ta reitera cu nos como Gobierno di Aruba ta aplica e tratado di Nacionnan Uni, cu esun cu ta huy pa su bida, y busca proteccion na Aruba, nos ta considera un refugiado. A trata di un reunion intenso pero fructifero. Mi ta contento cu UNHCR y Gobierno di Aruba ta trahando hunto pa adresa tur e reto cu tin riba tereno di e crisis migratorio cu Aruba ta enfrenta. Varios paisnan grandi ta enfrentando retonan similar, pero mi ta hopi orguyoso di mira con Aruba ta atende y cu e tema aki”, Prome Minister a indica.
