Oranjestad, ST. EUSTATIUS- Durante e bishita di Colegio di supervision financiero di Boneiro, Sint Eustatius y Saba (Cft) Colegio Ehecutivo di Sint Eustatius a duna un splicacion extenso di e decisionnan cu a tuma pa ataca e problemanan di capacidad di Seccion di Finansa structuralmente. Colegio Ehecutivo tin e firme proposito di contrata un oficina externo pa no solamente hiba e administracion financiero, sino tambe percura pa formacion di e seccion. “Pa basta tempo caba Cft a pidi atencion pa e problematica aki. Awor ta parce cu ta traha seriamente pa yega na un solucion”, segun Presidente Age Bakker.
Durante e bishita di Cft dia 28 y 29 di Maart a papia cu Colegio Ehecutivo y cu Conseho Insular di Sint Eustatius. Durante e combersacion un di e temanan principal tabata fortalecemento structural di Seccion di Finansa. Colegio Ehecutivo a señala cu ta scoge pa un enfoke cu na un banda guiamento y formacion di e empleadonan y na otro banda percura na mes momento pa un situacion di “compromiso continuo”. Cft a señala cu nan ta di acuerdo cu e enfoke ey. E necesidad pa fortalecemento ta grandi: Ainda Sint Eustatius no ta capaz di hiba un administracion al dia y cualitativamente satisfactorio.
Ademas di fortalecemento di Seccion di Finansa a delibera tambe tocante e proceso di presupuesto y di dunamento di cuenta y rason na Sint Eustatius. “Cumplimento cu e obligacionnan di reportahe te ainda no ta sosode suficientemente na tempo”, segun presidente di Cft. Ainda mester entrega e cuenta anual di 2015 y e di cuater reportahe di ehecucion di 2016. Presidente ta enfatisa cu e reportahenan aki ta di importancia tanto pa Colegio Ehecutivo como pa Conseho Insular pa haya conocemento y pa na un forma corecto por cumpli cabalmente cu nan tarea ehecutivo y di control.
Ehecucion di presupuesto
E control di accountant di e cuenta anual di 2015 a sufri tardansa considerabel. Aña 2015 ta cera segun expectativa cu un deficit di casi USD 0,6 miyon, cu lo keda compensa den e presupuesto di 2017. Considerando cu no a finalisa e control ainda, e resultado definitivo di 2015 por cambia ainda.
Sint Eustatius ta spera pa 2016 un resultado positivo di casi USD 0,5 miyon, cu cual ta compensa e deficit anterior di 2014, cu tin e mesun magnitud.
Relaciona cu e presupuesto di 2017, Ministro di Asunto Interno y Relacion den Reino a abstene su mes di duna su aprobacion na december. Actualmente ta trahando riba un presupuesto di 2017 revisa, den cual ta tene cuenta cu e recomendacionnan menciona den e conseho anterior di Cft. Ta di fundamental importancia pa mas pronto posibel finalisa e contrato cu NuStar na un forma satisfactorio, a fin di por provee un presupuesto di 2017 balansa y di por paga e contrato cu e oficina externo pa e administracion financiero.