Colegio di supervision financiero di Boneiro, Sint Eustatius y Saba (Cft) a enfatisa durante su bishita na Sint Eustatius dia 14 di december cu resultado visibel riba tereno di mehoramento di maneho financiero ta tarda y cu lo mester realisa nan rapidamente y efectivamente. “Di parti di Sint Eustatius tabatin disposicion pa ataca e problemanan di capacidad, pero esaki no a conduci den e ultimo lunanan na un Departamento di Finansa cu ta funciona bon”, segun Presidente Age Bakker. Door di trece sosten temporal den cas e trabou administrativo a mehora durante 2016 si, cu e resultado cu a entrega reportahe.
Durante e bishita di Cft a hiba combersacion cu Colegio Ehecutivo y Conseho Insular. Cft a observa cu calidad di e administracion financiero a mehora durante 2016, pero cu esaki a sosode principalmente danki na e sosten temporal cu a pone na disposicion pa medio di un contribucion di Ministerio Hulandes di Asunto Interno y Relacion den Reino. Sinembargo, e sosten temporal aki no ta ofrece un solucion na termino largo pa yega na un Departamento di Finansa solido. A delibera extensamente tocante tardamento di resultado visibel pa consolida Departamento di Finansa structuralmente. Aunke durante e bishitanan anterior Colegio Ehecutivo a reconoce e necesidad y disposicion pa yega na un Departamento di Finansa solido y competente, te awe esaki no a conduci suficientemente na accionnan concreto pa ataca e problemanan. Colegio Ehecutivo a informa Cft mas detayadamente tocante e stapnan cu e tin intencion di tuma na termino cortico pa ainda ataca e problemanan.
Ehecucion di presupuesto
Durante e bishita tambe a papia tocante e proceso di presupuesto y su hustificacion. A elabora e cuenta anual di 2015 y na e momentonan aki e accountant externo ta controland’e. Den e presupuesto di 2017 mester compensa e deficit spera completamente. Cft a indica cu e deficit spera di casi USD 631.000 pa 2015 por cambia ainda como consecuencia di e control; si esey ta e caso, anto lo mester elabora esaki den e presupuesto di 2017.
Vision den ehecucion di e presupuesto di 2016 a bira hopi miho danki na e esfuerso di e contratacion temporal. A base di agotamento di e presupuesto te cu september Sint Eustatius ta spera un resultado nihil, mientras cu den e gastonan a tene cuenta cu compensacion di e deficit di casi USD 506.000 cu a resulta den e cuenta anual di 2014. Cu Conseho Insular a delibera tocante e debenan na corto plaso cu ta creciendo, pa, entre otro, pensioen y e riesgonan financiero cu por resulta di esaki.
E Ministro di Asunto Interno y Relacion den Reino a apstene di duna e presupuesto su aprobacion. Gobierno di Sint Eustatius lo mester actua energicamente pa asina denter di un plaso rasonabel por duna cumplimento na e tumamento di decision di parti di e Ministro di Asunto Interno y Relacion den Reino y na e recomendacionnan di Cft.
Bishita di trabou na STUCO
Durante un bishita di trabou na e empresa di energia y awa STUCO Cft a laga nan inform’e tocante e diferente desaroyonan sostenibel na e empresa y nan impacto riba e entidad publico y e habitantenan di Sint Eustatius. Cft a felicita e director di STUCO Fred Cuvalay cu su aparicion den e top 100 den sostenibilidad di e corant Trouw di Hulanda.