Afpakteam ta bolbe pone beslag riba placa grandi na Airport

Aduana a detene ayera durante un control na aeropuerto internacional Reina Beatrix un pasahero femenino cu tabata viahando pa Republica Dominicana. E pasahero aki a keda sin meld cu e tabatin mas cu 35.000 Dollar den su posesion. E placa a wordo tuma den beslag y e persona a wordo entrega na Polis. E ta wordo sospecha di labamento di placa y keda sin meld un suma grandi di placa.
E placa cu wordo tuma den beslag lo wordo poni den e Fondo di Combati Criminalidad (Criminaliteitsbestrijdingsfonds) y lo wordo usa pa combatimento di crimen na Aruba.
Afpakteam ta un cooperacion entre Ministerio Publico, Cuerpo Policial di Aruba, Aduana, Fiot (Fiscale inlichtingen- en opsporingsteam) di Departamento di Impuesto (DIMP), FIOD (Fiscale Inlichtingen- en Opsporingsdienst, Marechaussee (KMar), Kustwacht di Aruba, Meldpunt (Ongebruikelijke Transacties) y RST. Cu tips y señalnan di labamento di placa por contact Afpakteam via [email protected] of yama tiplijn na 11141.

Comments

comments