Desde dia 1 di Maart 2017 a funda ” Integraal Afpakteam Aruba” pa alcansa e criminal unda mas e ta haci dolor, pues precisamente den su cartera. Tur hende por yuda bon den esaki. Si Bo conoce un hende cu no ta traha y Bo ta sospecha cu e persona aki, di un of otro manera, constantemente ta biaha, ta bisti paña caro, ta core den auto bunita y ta biba riba su nivel di bida, anto Bo por yama den forma anonimo na tipline 11141 pa duna e tip aki. Tambe Bo lo por manda un e-mail directamente na Integraal Afpakteam Aruba, na nan e-mail: [email protected].
Diaranson ultimo miembronan di “Integraal Afpakteam Aruba” a haci un presentacion y a suministra informacion na e Polisnan di Bario, na e “District Knooppunt (DIK), na e “Bureau Communicatie Voorlichting en Preventie” y tambe na e “Infodesk” di Cuerpo Policial Aruba. Meta di e presentacion y informacion tabata pa conscientisa tur presente cu no por premia criminalidad y cu awendia tur hende, pues no solamente e Polisnan, pero tambe e ciudadano trahado balente, mester por habri wowo y horea pa identifica tur cu ta yega na placa na un forma ilicito. Ta importante pa “tip” Afpakteam!
“Integraal Afpakteam Aruba” ta un cooperacion entre miembronan di Cuerpo Policial Aruba, Ministerio Publico, Servicio di Impuesto, Cuerpo di Aduana y Kustwacht. Tambe nos ta traha den cooperacion masha estrecho cu RST, FIU/MOT y e “Fusion Centre”. Hunto nos ta para mas duro, hunto nos ta forma un solo mokete: No por premia criminalidad! Bo tambe ta dispuesto pa coopera?