Pa minister di husticia Arthur Dowers e Afpakteam aki lo cuminsa cu casonan grandi di labamento di placa den e dianan aki mes paso mester atende e tema importante aki.
Sr. mr. Arthur Dowers a splica cu den e team lo tin un fiscal tambe, y esey lo haci cu e proceso lo cana hopi mas lihe. Por yega mas lihe tambe na confisca cierto medionan. Ta bay tin hopi experto hunto pa determina kico por y kico no por wordo confisca.
E ta bay ta un forma diferente di traha y ta spera cu e fiscal hunto cu e team, y tin hopi otro departamento manera Duana y tur departamento di husticia cu lo duna nan contribucion. Esey nifica cu hopi lihe lo bay tras di fondonan cu personanan cu a yega na fondonan na forma ilicito cu por confisca esaki. Tin parti cu ta hopi cla cu un hende a comete un crimen y door di e crimen ta kita cierto fondonan for di nan. No ta bay tras di e crimen cu a comete, pero tras di e placa cu nan tin. Hopi biaha e placa ta pone cu ta yega na e criminalnan.
Pero tin otro leynan tambe cu ta duna autoridad cu husticia por drenta den accion y tambe tin caminda cu otro departamento ta señala cierto cosnan cu no ta bon. Pero na final di dia si bo kier persigui un hende, mester haci’e den margen di ley cu nos codigo penal ta duna.
E departamento ta consisti di autoridadnan existente. Ta Ministerio Publico cu otro departamento ora yega cerca bo y constata cu tin cosnan robes. E ora e cliente no tin escogencia, autoridad ta tuma articulonan den beslag. Tin hende cu a bay Corte caminda cu hues a dicta cu den nos leynan ta permiti pa haci esaki. E cliente lo mester prueba cu a yega na propiedad of medionan via e caminda legal.
Minister di Husticia ta sumamente contento, ya cu esaki ta e plan di maneho cu a keda presenta caba aña pasa. E parti mas importante ta cu e resultadonan ta wordo poni den practica aworaki.
Na momento cu autoridad yega cerca e cliente, e ta cumpli cu tur normanan den ley. Y no ta paso cu tin un Afpak team, e ta haya autoridad pa haci y deshaci. Mester tene bo mes dentro di margen di ley. No ta asina cu ta haci fastioso cerca hende cu ta haci cosnan ilegal. Loke kier ta kita e probecho cu crimen ta trece pa cierto hendenan. Hopi lo bisa cu por fin husticia a prevalece.
E Afpakteam ta pas den nos sistema hudicial y esaki lo haci e proceso di beslag mucho mas eficiente. E hecho cu tur departamento ta trahando hunto caba, den e funcional center, den e plataforma di informacion entre departamentonan. Esey ta duna mas bista ariba cosnan cu ta bay robes den sociedad. E meta na comienso di gobernacion, ta pa crimen no paga y awo, sistematicamente ta construyendo un forma pa yega na e meta aki.
Aworaki, no solamente skirbi, pero e pruebanan t’ey di un ministerio cu a traha determina pa logra cierto cosnan. Contricantenan ta bisa cu no tin maneho, pero aworaki poco poco ta wak con cosnan ta logra den practica. E ministerio ta traha, pone cos riba papel y evalua. Pueblo mes lo mira kico gobierno a logra. E resultado ta pa pueblo husga.
Minister di Husticia ta bisa cu e lucha pa loke ta bringamento di crimen ta birando mas tenaz. Pero Minister tin confiansa cu si tur hende duna nan contribucion di nan banda, gobierno haci di nan parti, husticia y Finanza. Tin hopi mas cu mester contribui, pa zorg pa tin menos hende den e circuito criminal. Vooral e mucha jongnan, cu ta nace y crece den e ambiente aki.