Mescos cu añanan anterior, e temporada di fin di aña ta bay bira un temporada hopi druk na airport di Aruba. Sr. Hendrik Croes, vocero di Triple A ta elabora mas ariba esaki.
Aeropuerto a reuni cu tur e autoridadnan y tambe cu e partnernan na aeropuerto, pa e dianan druk cu ta na caminda. E dianan mas druk ta bay ta entre 15 di December pa 6 di Januari. Esaki ta unda cu e piek ta cuminsa. Pero tambe ta e mesun tempo cu dos proyecto ta bay keda cla, na gate 1 y 2. A kita e loadingbridge, pa asina refurbish pa asina nan bay bek den funcion, cu lo alivia e situacion sigur na e momento di mas druk.
Tin preparacionnan extra, ya cu tin vuelonan inaugural cu lo tuma luga dia 23 di December, cu ta cuminsa vuelonan di Delta for di Minneapolis y tambe for di Sun County. Dus akinan, atrobe ta treciendo extra vuelonan druk, pero airport ta cla pa esaki tambe.
Adicionalmente tin Aruba Airlines tambe lo bay agrega mas pasahero entre e islanan. Recientemente tabata tin tambe e otro aerolinea cu a cuminsa vuelo for di Las Piedras, cual ta Cerami Air. Esaki den fin di aña ta trece pasaheronan adicional. Como aeropuerto, nan ta cla pa esaki tambe…
Aeropuerto ta prepara hunto cu e departamento di CDP, unda cu tin un acuerdo cu tur vuelo pa Merca, mester ta conecta cu e loading bridge, awo nan tin espacio ariab e dianan mas druk, diasabra y diadoming, tin posibilidad di pone avion no na bridge, pero riba e apron di Airport cual ta yuda alivia e situacion. Trahando dilanti ta yega na solucionnan y ta bay alivia e situacion cual ta hopi stressfull, si e ta bay biaha den e dianan aki.
Triple A ta purba di haci pa tur cos cana mas smooth posibel. P’esey ta bon pa ta mas trempan pa Merca, zorg pa e papelnan ta na ordo. Y si ta biaha cu mucha, cu no ta mayor, zorg pa tin e carta.
Mescos cu Douane, y tur otro parternan cu ta traha na airport, cu cierto preocupacion cu e luga ta smal, pa cual Sr. Croes a splica cu e ta keda un punto cu mester di atencion ainda, pa e cantidad di pasaheronan ta grandi pa e fluho por bay mas miho. Pero a tuma nota caba, cu Douane mes tin su manera con nan ta adapta e fluho pa e bay mas lihe. Nan ta yuda e proceso cana un tiki mas lihe. E ta un proceso cu no ta den man di Triple A, ta pidi cooperacion di Douane. Aunke ta hopi druk, mester ta consciente, no por expect cu bo ta yega y pasa bay lihe. Ta haci lo posibel pa tur cos cana smooth.
Aeropuerto ta net na comienso pa expansion cual ta necesario mirando e cantidad di vuelo y pasahero cu ta aumentando. Espacio ta un punto cu ta keda traha ariba dje. Pero e proyecto cu ta na caminda, Gateway2030 esaki lo wordo adresa, y lo traha espacio pa acomoda e pasahero extra cu ta yega, segun Sr. Hendrik Croes, vocero di Triple A NV.