Recientemente Aruba Airport Authority N.V. (AAA) a atende e di 22 World Routes Development Forum Conference na Chengdu, China unda cu AAA a wordo representa pa Sra. Barbara Brown, Chief Commercial Officer y Sra. Jo-Anne Arends, Air Service Development Manager di AAA. Ta durante e evento di World Routes cu e OAG Marketing Award tambe ta wordo otorga. AAA un biaha mas tabata nomina pa e award pa excelencia den airline marketing bou di aeropuertonan cu ta procesa 1 pa 4 miyon pasahero pa aña, pero e biaha aki Aeropuerto di Aruba no a resulta ganador absoluto. Pero djis di wordo nomina y menciona durante e ceremonia ya caba ta un honor pa Aeropuerto di Aruba.
World Routes ta brinda un plataforma unico pa e profesionalnan cu ta desaroya ruta di tanto e aeropuerto- y aerolineanan pa reuni, desaroya y plania strategianan di ruta. E plataforma aki ta presenta oportunidadnan sin limite pa negosha y network door di trece mundo su miho aerolineanan hunto cu e aeropuerto y autoridadnan di turismo, dunando asina un plataforma mas eficiente den gasto y tempo pa organisacionnan cu ta desea di desaroya y expande nan networknan di ruta. E conferencia ta parti den 3 dia concentra di trabou pa asina moldea e futuro si servicio aereo rond mundo.
E ekipo di e AAA a reuni cu aerolineanan manera Southwest, JetBlue, United, KLM, TUI, LATAM, Copa, Condor, Alaska Airlines, British Airways y varios mas. E asina yama “City Pair meetings” tambe a tuma luga cu aeropuertonan den region manera Sanford International Airport di Orlando y Guarulhos di Sao Paolo.
E conferencia a brinda e oportunidad tambe pa personalmente reuni cu varios di e suppliernan di Aeropuerto di Aruba cu ta duna sosten y ta forma parti di e diferente actividadnan di Air Service Development na aeropuerto. E oportunidadnan pa aumenta e networknan actual y presenta Aeropuerto di Aruba na posibel partnernan nobo un biaha mas a wordo bon usa na e conferencia World Routes 2016.
“Mas cu 20 reunion a wordo teni y AAA ta sigur cu e oportunidadnan nobo y existente pa desaroya ruta a keda fortifica y lo resulta cu exito”, asina Sra. Arends a bisa.