Aruba Airport Authority N.V. (AAA), e compania cu ta opera y maneha Aeropuerto Internacional Reina Beatrix (Aeropuerto di Aruba) a firma un acuerdo cu BEUMER Group pa e diseño y instalacion di un “high speed baggage transportation and sortation system” nobo como parti di Aeropuerto su proyecto di expansion y modernisacion Gateway 2030. A yega na e contract despues di e proceso di tender cu a wordo teni, unda cu Aeropuerto a evalua e opcionnan pa un solucion general pa e procesamento di maleta y teniendo na cuenta no solamente e aspecto financiero, pero tambe e mantencion continuo cu mester ta parti di dje una bes cu e sistema ta funcionando.
E contract cu BEUMER group ta inclui e instalacion di un “dual-loop CRISBAG® – High Speed Baggage Transportation and Sortation System”, cu integracion den un sistema di screening EDS cu ta cumpli cu e rekisitonan di TSA y un “Baggage Image Weight Identification System” (BIWIS) pa yuda den e proceso di U.S. preclearance. E acuerdo ta inclui tambe un periodo di mantencion continuo y partinan di spare despues cu e sistema wordo poni den funcion.
E sistema nobo di baggage handling (BHS) lo elimina e rekisito pa piki maleta cu ya a check-in caba pa bolbe pasa e di dos proceso di screening cu mester wordo haci actualmente den e operacion di U.S. CBP Pre-Clearance. Adicionalmente, e sistema nobo lo permiti pa pasaheronan cu ta biaha pa Merca y esnan cu ta biaha pa otro destinacion lo por haci uso di e mesun facilidad di check-in.
E diseño final di BEUMER su “tote-based CRISBAG® system” lo wordo haci den colaboracion cu Aeropuerto su diseñador di e terminal principal, NACO; den e esfuerso pa sigura cu e sistema di BHS y e edificio unda ta procesa maleta cuadra bon cu otro, y cu e sistema nobo wordo diseña y construi di un forma eficiente. E instalacion lo cuminsa den di tercer kwartaal di 2020 y e lo keda finalisa den e segundo kwartaal di 2021, den coordinacion cu e apertura di e fase di construccion 1 di e proyecto Gateway 2030.
“Nos ta hopi satisfecho di por a crusa e milestone importante aki” asina CEO di Aruba Airport Authority N.V. James Fazio a bisa. “E sistema nobo di baggage handling ta e parti central di aeropuerto su proyecto di expansion y lo permiti pa e modernisacion di varios di nos procesonan di pasahero y un operacion mas eficiente di U.S. Customs pre-clearance, un sistema di screening di maleta mehora, y un uso mas eficiente di e edificio pa check-in. Nos ta hopi contento di haci e proyecto pa e sistema importante aki hunto cu BEUMER Group y nos ta ansioso pa traha pa transforma nos aeropuerto den e añanan nos dilanti.”
BEUMER Group a persigui e proyecto di Aeropuerto di Aruba como un oportunidad pa demostra como e prome den e industria pa mustra e sistema integra di ICS (CRISBAG) hunto cu e sistema di “bag storage” (CRISSTORE) pa maneha e demandanan durante e orarionan peak di e aeropuerto. Barry Lagerstedt, Senior Vice President a bisa: “Nos ta hopi contento di a wordo selecta como partner pa e proyecto importante aki. E aplicashon di e US Customs Pre-Clearance como tambe e echo cu mester tene cuenta cu e protocol di baggage screening segun reglanan di TSA ta un aplicashon perfecto den nos CRISBAG “baggage handling and storage solution” integra y ta brinda e confiansa y seguridad di mas halto di tur e sistemanan existente. Nos ekipo a traha hopi di serca cu e ekipo di Aeropuerto di Aruba pa verifica e capabilidadnan, beneficionan operacional y futuro capabilidadnan. Nos ta orguyoso pa diseña un sistema di tal escala y “tote-based” y nos ta spera di por forma un relacion di largo duracion cu Aeropuerto di Aruba.”
E invitacionnan inicial relata cu e tender pa e Contratista principal pa e proyecto Gateway 2030 a sali dia 12 di November 2018 y Aruba Airport Authority N.V. lo organisa un “Construction Fair” na Aruba dia 29 di November 2018 pa presenta e proyecto y crea un forum pa companianan di construccion internacional pa topa y forma partnerships cu sub-contratistanan local, business y tax consultants, y otro agentenan oficial relevante di parti di e diferente ministerionan gubernamental.