Ta asina cu ayera durante reunion publico pa trece un solucion concreto pa e problematica cu piscadornan ta experencia a aproba tres mocion.Tin un discusion andando aworaki si e reunion ta legal of ilegal y permitimi splica esaki.
REGLEMENT VAN ORDE
Ta asina cu e reglement van orde di Parlamento ta regla e quorumvereiste, es decir e minimo cantidad di Parlamentario cu mester ta presente den sala di Parlamento pa e reunion por inicia y continua unabes cu e a wordo inicia. Sinembargo e reglement van orde tambe ta regla cu por desvia di e quorumvereiste. A base di esaki e fraccionnan den Parlamento a yega na un palabracion cu tur 21 Parlamentario mester bay di acuerdo pa por desvia.
Pues Reunión por a tuma lugar según e palabracion aproba pa desvía di RvO
A base di esaki tur 21 Parlamentario a duna nan aprobacion por escrito pa e reunion di ayera por a tuma lugar na e siguiente manera. En total tawata tin 18 Parlamentario cu a presenta pa e reunion y cu a firma tambe pa esaki.
VOTACION
Ora e parti di votacion a inicia majoria di parlamentarionan tabata den sala di Parlamento presente conforme art 45 RvO y e Parlamentarionan di AVP y RED cu a abstene di vota, a haci uso di nan “stemmotivering” pues a participa na e proceso di votacion. Sinembargo nan a abstene di vota, cual ta nan derecho.
Esaki a conduci cu e mayoria di esnan presente a vota na fabor di tur tres mocion. Loque ta trata e mocion di desconfiansa 10 parlamentario a vota na fabor y 8 a abstene di vota. Pues e mocion di desconfiansa a wordo aproba cu 10 voto na fabor di 18 cu por a vota. Cual ta un majoria rekeri.
PA CONCLUI
Mi kier enfatisa cu e proceso aki cu Parlamento ta usa ta debi na e Crisis di COVID, sinembargo a tene cuenta cu tur aspecto huridico. Na mes momento ta importante pa indica cu ta for di maart di e aña aki ora cu e situacion di COVID a bira mas serio na Aruba nos a cuminsa aplica e proceso aki. Pues for di maart 2020 tur reunion publico ta bay a base di e mesun principio y procedura cu a aplica ayera.