E comision boluntario Blue Energy di Hilton Aruba Caribbean Resort & Casino a opta pa comparti alegria navideño door di duna muchanan menos afortuna regalonan bunita e Pasco aki. Nan a comparti e idea di “Let’s adopt a child for Christmas” entre coleganan di e hotel y den dos dia e miembronan di ekipo a registra, escoge un regalo for di e lista di muchanan participando, cumpra e regalo, lor’e y entreg’e na hotel caminda tur a wordo colecta y hiba pa e muchanan di entre 9 luna y 12 aña, cerca e coordinador di Wit Gele Kruis, Monique Giel. Un total di 66 regalo a wordo cumpra, den adicion di Care Packages cu pampers, formula y paña pa tienermoeders, cual a yega na un total di 75 miembro di ekipo generoso cu a contribui.
E representante di Hilton Blue Energy cu a coordina e iniciativa aki tabata Jessica Valbuena, kende ta e Champion Board Member di e comision cu ta encarga cu “Travel with a Purpose”. Dia 20 di december, manera por aprecia riba potret, e Blue Energy Committee a entrega tur e regalonan na hoofdkantoor di Wit Gele Kruis, caminda cu nan a wordo ricibi pa director Gino Goeloe.
E Blue Energy Committee ta representa vitalidad, pasion y orguyo cu ta representa e miembronan di ekipo, como parti di e Hilton brand. E ta un expresion di e espirito unico cu e miembronan di ekipo ta demostra nan huespednan, nan comunidad y demostra otro.
E comision boluntario ta reuni mensualmente pa establece metanan y priorisa plannan cu lo encurasha cada uno pa yena e mundo aki cu luz y e calor di hospitalidad. E diversidad di e diferente miembro di e departamentonan ta permiti e comision pa un intercambio rico na opinion, ideanan, y perspectiva, cu ta resulta den un enfoke colectivo pa logra resultadonan excepcional.