BERLIN, Alemania – E accionnan di Adidas a toca un maximo historico diahuebs, despues cu e compania Aleman di paña deportivo a reporta un aumento mayor den su benta y ganashinan di e prome trimester, cu tambe a supera na esun di su rival Nike na Merca y China y a refleha un rapido crecimento riba e mercado di internet.
Tras di a perde tereno pa varios aña dilanti di su rival Mericano, Adidas a lansa un gran campaña di marketing na Merca pa desafia Nike riba su propio tereno, logrando cu consumidornan cumpra un masa di su kednan Boost y Superstars.
E ganashi neto di Adidas den e prome trimester a subi un 30 porciento, na 455 miyon di euro (496 miyon di dollar), mientras cu su bentanan a aumenta un 19 porciento na 5670 miyon di euro, superando e prevision di analistanan.
E accionnan di Adidas a avansa un 1.84 porciento na 185 euro pa 11’or y 40 di awe mainta, ora local, tras alcansa previamente diahuebs un record di 188.95 euro.
Adidas, dirigi desde October di aña pasa pa e presidente ehecutivo Kaspar Rorsted, a confirma un prevision di crecemento den benta na 2017 di entre 11 y 13 porciento, despues di considera riba su cuenta fluctuacionnan cambiario, entre otro aspectonan.
“Esaki ta sugeri implicitamente un desaceleracion den e impulso di ganashi den e proximo trimesternan den comparacion cu e prome trimester,” e banco DZ Herbert Sturm a bisa, ora di reduci su recomendacion riba e accionnan di Adidas, na “mantene” desde “cumpra.”
Na Merca y China, su mercadonan mas grandi, e benta di Adidas, a subi un 31 y 30 porciento, respectivamente, nivelnan hopi superior di e tasanan di crecemento cu Nike a reporta pa e trimester, finalisando dia 28 di Februari.
Adidas a bisa tambe, cu su crecemento trimestral tabata particularmente fuerte den e comercio electronico, cu un alsa di 53 porciento den su ingresonan. Adidas a anuncia na Maart cu e lo duna gran enfasis na su negoshi riba internet, den duplica su obhetivo di benta den e comercio electronico pa 2020 pa 4000 miyon di euro.
Fuente: Reuters